संभाजीनगर :ऑनलाईन रिपोर्टर
शेतकऱ्यांचे उत्पन दुप्पट करण्यासाठी डांगोरा पिटला जात असताना प्रत्यक्षातम मराठवाड्यात शेतकऱ्यांची किती भयावह अवस्था सुरु आहे याचीच प्रचिती आली आहे. महाराष्ट्रातील शेतकरी परिस्थितीशी संघर्ष करत असतानाच एकट्या मराठवाडा विभागातील आठ जिल्ह्यातील 267 शेतकऱ्यांनी आत्महत्या केल्याचे समोर आलं आहे. त्यामुळे राज्यात निवडणुकीची रणधुमाळी सुरु असतानाच दुसऱ्या बाजूला शेतकऱ्यांच्या संसाराची राखरांगोळी सुरु असल्याचे भयावह चित्र आहे. मराठवाडा विभागात सर्वाधिक आत्महत्या ऊस मजूर सर्वाधिक असणाऱ्या बीड जिल्ह्यात झाल्या आहेत.
बीड जिल्ह्यात सर्वाधिक शेतकऱ्यांच्या आत्महत्या
मराठवाड्यात गेल्या चार महिन्यात 267 शेतकऱ्यांनी आत्महत्या केल्या असून सर्वाधिक आत्महत्या बीड जिल्ह्यातील शेतकऱ्यांच्या आहेत. बीडमध्ये 59 शेतकऱ्यांनी आत्महत्या केल्या आहेत. त्यानंतर छत्रपती संभाजी नगरचा नंबर असून 44 शेतकऱ्यांनी आत्महत्या केल्या आहेत.
त्यामुळे निसर्गाच्या दृष्टचक्रात सापडलेल्या शेतकऱ्यांची वाताहत सुरु असल्याचे चित्र आहे. शेती आणि शेतकऱ्यांसाठी बेंबीच्या देठापासून घसा कोरडा केला जात आहे. यासाठी शासकीय आकडेवारीची फेकाफेकी केली जात असली, तरी शेतकऱ्यांपर्यंत किती लाभ पोहोचत आहेत याचाच अंदाज येण्यास आत्महत्यांची आकडेवारी पुरेसी आहे.
गेल्या चार महिन्यात झालेल्या आत्महत्या
जालना 29
परभणी 12
हिंगोली 13
नांदेड 41
बीड 59
लातूर 27
धाराशिव 42
एकूण 267
2023 मध्येही तब्बल 1,088 शेतकऱ्यांच्या आत्महत्या
गेल्या चार महिन्यांत 267 शेतकऱ्यांच्या आत्महत्या झाल्या असतानाच 2023 मध्ये मराठवाड्यातील आठ जिल्ह्यांमध्ये तब्बल 1,088 शेतकऱ्यांनी आत्महत्या केल्याचे विभागीय आयुक्त कार्यालयाच्या अहवालातून समोर आले होते. 2022 च्या तुलनेत हा आकडा 65 ने वाढला होता.
2023 मध्ये झालेल्या 1,088 आत्महत्यांपैकी बीडमध्येच सर्वाधिक 269 आत्महत्या झाल्या होत्या. छत्रपती संभाजीनगरमध्ये 182, नांदेडमध्ये 175, धाराशिवमध्ये 171 आणि परभणीमध्ये 103 आत्महत्या झाल्या, असे अहवालात नमूद करण्यात आले आहे. जालना, लातूर आणि हिंगोली येथे अनुक्रमे 74, 72 आणि 42 मृत्यूची नोंद झाली आहे. मराठवाड्यात 2022 मध्ये सुद्धा 1,023 शेतकरी आत्महत्या झाल्या. ज्यामध्ये छत्रपती संभाजीनगर, जालना, बीड, हिंगोली, धाराशिव, लातूर, नांदेड आणि परभणी जिल्ह्यांचा समावेश आहे.
