पायी जाणार्‍या तरुणांना कंटेनरने चिरडले

सहा जागीच ठार
तरुण पेंडगावला देवदर्शनाला जात होते
बीड शहरावर शोककळा

बीड (रिपोर्टर): बीडहून छत्रपती संभाजीनगरकडे भरधाव वेगात जाणार्‍या कंटेनरने पायी जाणार्‍या सहा तरुणांना पाठीमागून जोराची धडक दिल्याने या अपघातात सहा तरुण गंभीररित्या जखमी होऊन ठार झाले. घटनास्थळी चार तरुण मयत झाले तर उपचारा दरम्यान दोन तरुणांचा मृत्यू झाला. अपघात इतका भीषण होता की, घटनास्थळी रक्त मांसाचा सडा पडला होता. घटनेची माहिती बीड ग्रामीण पोलिसांना झाल्यानंतर पोलिसांनी घटनास्थळी जावून कंटेनर चालकाला ताब्यात घेतले. ही दुर्दैवी घटना सकाळी साडेसात वाजण्याच्या सुमारास नामलगाव फाट्यावरील उड्डाण पुलाजवळ घडली. या घटनेने बीड शहरावर शोककळा पसरली आहे.

आज शनिवार असल्याने सहा तरुण पेंडगाव येथील प्रसिद्ध असलेल्या हनुमान मंदिराच्या दर्शनाला पायी जात होते. सकाळी साडेसात वाजण्याच्या दरम्यान बीडहून छत्रपती संभाजीनगरकडे निघालेल्या कंटेनर (क्र. एन.एल. 01 ए जी. 3197) ने या तरुणांना पाठीमागून जोरदार धडक दिली. यामध्ये आकाश अर्जुन कोळसे (रा. बीड), दिनेश दिलीप पवार (रा. नाळवंडी नाका), विशाल श्रीकृष्ण काकडे (रा. शेकटा ता. गेवराई), किशोर गुलाब तावरे (रा. गेवराई), अनिकेत रोहीदास शिंदे (रा. शिदोड) आणि पवन शिवाजी जगताप (रा. अंबिका चौक) हे सहा जण गंभीररित्या जखमी होऊन ठार झाले. घटनास्थळी चौघा जणांचा मृत्यू झाला तर उपचारा दरम्यान दोघे मयत झाले. अपघात इतका भीषण होता की, घटनास्थळी रक्त-मांसाचा सडा पडला होता. घटनेची माहिती बीड ग्रामीण पोलिसांना झाल्यानंतर पोलिसांनी घटनास्थळी जावून पंचनामा केला.

मृतदेह जिल्हा रुग्णालयामध्ये शवविच्छेदनासाठी आणण्यात आले होते. कंटेनर चालकाला पोलिसांनी अटक केली. सदरील या दुर्दैवी घटनेची माहिती मयत तरुणांच्या घरच्या लोकांना व मित्र परिवाराला माहिती झाल्यानंतर अनेकांनी घटनास्थळी धाव घेतली. मयतांच्या नातेवाईकांच्या आक्रोशामुळे जिल्हा रुग्णालय परिसर सुन्न झाला होता. घटनेची माहिती झाल्यानंतर अनेक राजकीय नेत्यांनी आणि कार्यकर्त्यांनी जिल्हा रुग्णालयात धाव घेतली. या दुर्दैवी घटनेने बीड शहरावर शोककळा पसरली आहे.

घटना वेदनादायी
उपमुख्यमंत्र्यांनी दुर्घटना टाळण्यासाठी प्रभावी उपाययोजना करण्याचे दिचले निर्देश
आज सकाळी बीड जिल्ह्यातील पेंडगाव फाटा येथे झालेल्या भीषण अपघातात सहा भाविकांचा मृत्यू झाला, ही घटना अत्यंत वेदनादायी आहे. पायी देवदर्शनासाठी निघालेल्या निष्पाप जीवांचा मृत्यू झाल्यानं मन हेलावून गेलं आहे. या अपघातातील मृतांना मी भावपूर्ण श्रद्धांजली अर्पण करतो आणि त्यांच्या शोकाकुल कुटुंबियांप्रति सहसंवेदना व्यक्त करतो. मी स्वतः बीडचे जिल्हाधिकारी आणि बीड पोलीस अधीक्षक यांच्याशी दूरध्वनीवरून संपर्क साधून घटनेची सविस्तर माहिती घेतली असून त्यांना आवश्यक त्या सूचना दिल्या आहेत. या दुर्दैवी घटनेची सखोल चौकशी करून दोषींवर कठोर कारवाई करण्याचे आदेश पोलीस प्रशासनाला देण्यात आले आहेत. तसंच मृतांच्या कुटुंबियांना शासन स्तरावरून तातडीनं सर्वोतोपरी मदत उपलब्ध करून दिली जाईल. भविष्यात अशा दुर्घटना टाळण्यासाठी वाहतूक सुरक्षेबाबत अधिक कडक व प्रभावी उपाययोजना करण्याचे निर्देश संबंधित विभागांना दिले आहेत.