दोन्ही राष्ट्रवादीच्या बैठका, अजित पवारांच्या राष्ट्रवादीची ताकद वाढली
माजी मंत्री जयदत्त क्षीरसागर अजितदादांच्या गटात प्रवेश करणार
बीड(रिपोर्टर): जिल्हा परिषद, पंचायत समिती, नगरपालिका निवडणुकांच्या अनुषंगाने बीड जिल्ह्यात पक्षीय पातळीवर तयारी सुरू झाल्याचे दिसून येत असून महायुती विरुद्ध महाविकास आघाडी अशी लढत होईल, असे वाटत असतानाच महायुतीत मात्र स्वबळावर लढण्याचा नारा दिला जात आहे. त्यामुळे जिल्हा परिषद असो अथवा नगर परिषद असो या दोन्ही निवडणुकांमध्ये बंडखोरीसह तिरंगी-चौरंगी लढतीची आजच दाट शक्यता वर्तवली जात आहे. बीड जिल्ह्यात दोन राष्ट्रवादी विरुद्ध भाजप अशी लढत अनेक ठिकाणी होताना दिसून येईल. अजित पवारांच्या राष्ट्रवादीची ताकद सध्यातरी बीड जिल्ह्यात मोठ्या प्रमाणात दिसून येत असून राज्याचे माजी मंत्री जयदत्त क्षीरसागर हे आपल्या कार्यकर्त्यांसमवेत अजित पवारांच्या राष्ट्रवादीमध्ये डेरेदाखल होत आहेत. पाडव्याचा मुहूर्त ठरल्याचे सांगितले जात असून मुंबईमध्ये जयदत्त क्षीरसागर हे प्रवेश करतील, असेही सुत्रांचे सांगणे आहे.
नगरपालिका जिल्हा परिषद या स्थानिक स्वराज्य संस्था निवडणुकांच्या अनुषंगाने गेल्या दोन दिवसात अजित पवारांच्या राष्ट्रवादीसह शरद पवारांच्या राष्ट्रवादीच्या कार्यकर्त्यांची बैठक झाली. प्रमुख कार्यकर्त्यांच्या उपस्थितीतील या बैठकीमध्ये निवडणूक लढवण्यापासून ते युतीपर्यंत चर्चा झाली. सुत्रांचे सांगणे आहे, महायुतीमधील भाजप आणि अजित पवारांच्या राष्ट्रवादीमध्ये युती होण्याची धूसर शक्यता आहे. त्यामुळे हे दोघेही स्वबळावर लढण्याच्या तयारीमध्ये ठिकठिकाणी दिसून येत आहेत. अजित पवारांच्या राष्ट्रवादीची बीडमध्ये मोठी ताकद आहे. त्यात माजी मंत्री जयदत्त क्षीरसागर हे अजित पवार गटाकडे जाहीर प्रवेश करत आहेत. पाडव्या दिवशी मुंबईत त्यांचा प्रवेश होणार असल्याचे सूत्रांचे सांगणे आहे. दुसरीकडे शरद पवार गटाची राष्ट्रवादीही हाबूक ठोकून तयार आहे. तर भारतीय जनता पार्टी स्वबळावर निवडणूक लढवण्याची इच्छा बाळगून असल्याचे सांगितले जाते. पर्यावरणमंत्री पंकजा मुंडे यांच्या नेतृत्वात बीड जिल्हा भाजपाची निवडणूक होईल, मात्र जिल्हा परिषद निवडणुकीबाबत आष्टी-पाटोदा-शिरूर येथील उमेदवारांची निवड आ. सुरेश धस हे करतील, असेही सांगण्यात येते. एकूणच स्थानीक स्वराज्य संस्थेच्या निवडणुकीच्या अनुषंगाने सर्वच पक्ष तयारीला लागले आहेत.
