माजलगाव (बीड) | रिपोर्टर
नगरपालिका निवडणुकीपूर्वी विकासाचा गाजावाजा करणाऱ्या राष्ट्रवादी काँग्रेस अजित पवार गटाचे आमदार प्रकाश सोळंके यांना माजलगावच्या मतदारांनी जोरदार धक्का दिला आहे. सोळंके समर्थित उमेदवाराला थेट तिसऱ्या क्रमांकावर ढकलत मतदारांनी मोठा राजकीय उलटफेर घडवून आणला. या निवडणुकीत राष्ट्रवादी काँग्रेस शरद पवार गटामध्ये दिसून आलेल्या अभूतपूर्व एकीचा फायदा माजी नगराध्यक्ष सहाल चाऊस यांच्या सून महरीन शिफा बिलाल चाऊस यांना झाला असून त्यांनी तब्बल अडीच हजार मतांनी दणदणीत विजय मिळवत नगराध्यक्षपद पटकावले.
यापूर्वी माजलगाव नगरपालिका भाजप व शिवसेनेचा बालेकिल्ला मानली जात होती. भाजपच्या संध्या ज्ञानेश्वर मेंडके या जातीय समीकरणात आघाडीवर असल्याचे चित्र होते. मात्र शहरात भाजपकडे ठोस नेतृत्वाचा अभाव आणि राज्याच्या मंत्री पंकजा मुंडे यांचे दुर्लक्ष याचा फटका भाजपला बसल्याचे निकालातून स्पष्ट झाले. प्रभाग क्रमांक चारमधून भाजपच्या तिकिटावर दीपक मेंडके निवडून आले असले तरी हा विजय त्यांच्या वैयक्तिक कर्तृत्वाचा असल्याची चर्चा शहरात होती. याच प्रभागातून त्यांच्या पत्नी रेश्मा मेंडके यांनीही विजय मिळवला. मात्र एकूणच भाजप व शिवसेनेच्या दोन्ही गटांच्या अनेक उमेदवारांचे डिपॉझिट जप्त झाल्याने दोन्ही पक्षांचा या निवडणुकीत जवळपास सुपडा साफ झाल्याचे चित्र दिसून आले.
मागील अनेक वर्षांपासून शहराच्या विकासाचे दावे करणाऱ्या आ. प्रकाश सोळंके यांनी २०० ते ३०० कोटी रुपयांहून अधिक निधी शहरासाठी आणल्याचा दावा केला होता. मात्र या निधीतून झालेली कामे अत्यंत निकृष्ट दर्जाची असल्याचा आरोप होत असतानाही आमदार सोळंके यांनी यावर कधीही स्पष्ट भूमिका घेतली नाही. त्यामुळे भ्रष्टाचाराला अप्रत्यक्ष प्रोत्साहन दिल्याची भावना नागरिकांमध्ये निर्माण झाली. विकासाच्या नावाखाली आलेला कोट्यवधींचा निधी ‘पाण्यात गेल्याचा’ आरोप करत मतदारांनी सोळंके गटाच्या उमेदवाराला तिसऱ्या क्रमांकावर पाठवून आपला रोष व्यक्त केला.
राष्ट्रवादी काँग्रेस शरद पवार गटाकडून महरीन शिफा बिलाल चाऊस यांना उमेदवारी देण्यात आली होती. त्यांच्या प्रचाराची धुरा बहुजन विकास मोर्चाचे बाबुराव पोटभरे यांनी समर्थपणे सांभाळली. त्याचबरोबर मोहन जगताप, नारायण डक आणि सहाल चाऊस यांनी दाखवलेल्या एकीमुळे विजयाचा मार्ग अधिक सुकर झाला. या संघटित ताकदीच्या जोरावर सहाल चाऊस यांच्या सून नगराध्यक्षपदी विराजमान झाल्या.
निवडणुकीच्या अंतिम निकालानुसार नगरसेवक संख्येत
– राष्ट्रवादी काँग्रेस शरद पवार गट : १०
– राष्ट्रवादी काँग्रेस अजित पवार गट : १०
– काँग्रेस : १
– भाजप : १
– एमआयएम : १
– अपक्ष : ३
असे चित्र समोर आले आहे.
दरम्यान, या निवडणुकीत अनेक दिग्गजांना मतदारांनी स्पष्टपणे नाकारले. प्रभाग क्रमांक १० मध्ये माजी आमदार राधाकृष्ण होके पाटील यांचे पुतणे अभय होके पाटील, भाजप सोशल मीडिया सेलचे दत्ता महाजन, भाजप शहराध्यक्ष विनायक रत्नपारखी, मुंबई बाजार समितीचे माजी सभापती अशोक डक यांचे पुतणे अजिंक्य डक, तसेच माजी नगराध्यक्ष सुमनबाई मुंडे यांचा पराभव झाला. तर माजी नगराध्यक्ष शेख मंजूर यांना अवघी १२७ मते मिळाल्याने त्यांना आपले डिपॉझिटही वाचवता आले नाही.
एकूणच माजलगाव नगरपालिकेच्या या निवडणुकीने शहराच्या राजकारणात नवे समीकरण निर्माण करत ‘विकासाच्या दाव्यांपेक्षा कामाची गुणवत्ता महत्त्वाची’ असा स्पष्ट संदेश दिला आहे.
