शिंदेवाडी फाट्याजवळील दुर्घटनेने माजलगाव तालुक्यात शोककळा
माजलगाव : खामगाव-पंढरपूर राष्ट्रीय महामार्गावरील माजलगाव ते तेलगाव रस्त्यावर शिंदेवाडी फाट्याजवळ रविवारी (दि. १८) सकाळी ११ वाजण्याच्या सुमारास एसटी बस आणि हुंडाई कारची समोरासमोर भीषण धडक झाली. या भीषण अपघातात कारमधील पाच जणांचा जागीच मृत्यू झाला. या घटनेमुळे माजलगाव शहरासह संपूर्ण तालुक्यात शोककळा पसरली आहे.
मिळालेल्या प्राथमिक माहितीनुसार, महामार्गावरून जाणारी एसटी बस (एमएच २०-२४४०) आणि हुंडाई कार (एमएच २६-४२१०) यांची शिंदेवाडी फाट्याजवळ जोरदार धडक झाली. धडक इतकी भीषण होती की, कारमधील पाचही जणांचा जागीच मृत्यू झाला.
मृत व्यक्ती माजलगाव शहर व परिसरातील रहिवासी असल्याची प्राथमिक माहिती आहे. मात्र, मृतांची नावे आणि अपघाताचे नेमके कारण अद्याप स्पष्ट झालेले नाही. या दुर्घटनेची माहिती मिळताच परिसरात हळहळ व्यक्त होत असून, पोलिसांकडून पुढील तपास सुरू आहे.
