टेम्पोखाली दबलेल्या चालकाला मदत करण्याऐवजी लोकांनी कोंबड्या पळविल्या
बीड (रिपोर्टर) परभणीवरून माजलगावकडे कोंबड्या घेऊन जाणार्‍या एका टेम्पोला एका भरधाव वेगात आलेल्या लक्झरीने कट मारल्याने टेम्पो पलटी झाला. त्यामुळे टेम्पोचा चालक टेम्पोखाली दबला होता. या वेळी त्याला मदत करण्याऐवजी अनेकांनी टेम्पोतील कोंबड्या लंपास केल्या. ही घटना आज सकाळी साडेपाच वाजता माजलगाव-परभणी रस्त्यावर घडली.
महंमद जाफर (रा. परभणी) हे कोंबड्याने भरलेला टेम्पो घेऊन माजलगावकडे येत होते. त्यावेळी त्यांच्या टेम्पोला समोरून येणार्‍या एका लक्झरीने कट मारल्याने टेम्पो पलटला. त्यामुळे चालक महंमद जाफर हे टेम्पोखाली दबले. त्यावेळी अनेक जणांनी तेथे गर्दी केली. या वेळी चालकाला मदत करण्याऐवजी अनेकांनी कोंबड्या घेऊन पळ काढला. टेम्पो पलटल्याची माहिती माजलगाव ग्रामीण पोलिसांना मिळाल्यानंतर पोलिसांनी अशोक मिसाळ यांनी घटनास्थळी भेट दिली. तत्पूर्वी काही नागरिकांनी चालकाला मदत करून उपचारासाठी रुग्णालयात दाखल केले.
