दिंद्रुड(रिपोर्टर) धारुर तालुक्यातील चाटगाव तलावाचा सांडवा पुन्हा फुटला असून येथील तलावाची सुरक्षा रामभरोसे झाली आहे. गेल्यावर्षी हि कोणीतरी अज्ञाताने हाच सांडवा फोडल्याची तक्रार देण्यात आली होती. परत यावर्षीही हा सांडवा फुटल्याने आठ ते दहा दिवसांपासून लाखो लिटर पाणी वाया जात असून, पाटबंधारे विभागाने जाणीवपूर्वक दुर्लक्ष केले आहे.
दिंद्रुड सह परिसरातील चार ते पाच गावांना व शेतीला पाणीपुरवठा करणार्‍या चाटगाव तलावाचा सांडवा प्रत्येक वर्षी फोडण्यात येतो. मात्र तेलगाव पाटबंधारे विभागाचे शाखाधिकारी जाणून बुजून जाणीवपूर्वक याकडे दुर्लक्ष करत असल्याचे दिसत आहे. हा सांडवा फोडून दहा ते बारा दिवस झाल्याचे चाटगाव ग्रामस्थांनी सांगितले. सांडवा फुटल्याची कल्पना येथील सरपंचाने शाखाधिकारी शेख यांना दिलेली असताना सांडवा का बुजवण्यात आला नाही. त्यामुळे शेतकरी व चार गावच्या ग्रामस्थांकडून पाटबंधारे विभाग व संबंधित शाखा अधिकार्‍या विरोधात प्रचंड संताप व्यक्त होत आहे. गेल्या वर्षी ग्रामस्थांच्या व दै रिपोर्टर च्या सजगतेमुळे संबंधित विभागाने फुटलेला सांडवा दुरुस्त केला होता. यावर्षी मोठ्या प्रमाणात पाऊस झाल्यामुळे चाटगाव तलाव पूर्ण क्षमतेने भरला असून, त्यामुळे परिसरातील चार ते पाच गावाच्या पिण्याच्या पाण्याचा प्रश्‍न व शेतातील पिकांना जगवण्याचे काम हा तलाव करतो. तरीदेखील पाटबंधारे विभागाचे शाखा अधिकारी आरोपींना पाठीशी तर घालीत नाहीत ना ? अशी चर्चा शेतकरी व ग्रामस्थांमध्ये सुरू आहे. यापुढे काही अनुचित प्रकार घडला आणि उन्हाळ्यात एप्रिल, मे या दोन महिन्यात पिण्याच्या पाण्याची उणीव भासते, नव्हे तर तलावातील पाणी कमी झाले तर प्रशासनाला टँकर चालू करून या तीन ते चार गावाच्या गावकर्‍यांची तहान भागवावी लागते. प्रत्येक वर्षी चाटगाव तलावाचा सांडवा फुटतो आणि लाखो लिटर पाणी वाया जाते. यावर्षी तर सांडवा फुटून दहा ते बारा दिवस झाले असताना पाटबंधारे विभागाने कुंभकर्णी झोप घेतली आहे. हा खूप गंभीर प्रकार असून संबंधित शाखाधिकारी या कामात कुचराई करत असल्याचे स्पष्ट होत आहे. दहा ते बारा दिवसांपासून फुटलेला सांडवा अद्याप का बंद करण्यात आला नाही का पाटबंधारे विभाग चाटगावचा तलाव फुटण्याची वाट पाहतेय या चर्चेला परिसरात उधाण आले आहे.
- फुटलेल्या सांडव्या च्या ठिकाणी खोदकाम करुन,जाडी लावून सिमेंट काँक्रीट ची चादर टाकावी लागणार आहे. सध्या तलाव पूर्ण भरला असल्याने फुटलेला सांडवा बुजता येत नाही. त्यामुळे तलावातील पाणी कमी झाल्यास सांडवा दुरुस्त करण्यात येईल.
-शेख वामीक
शाखाधिकारी पाटबंधारे उपविभाग तेलगाव
दरवर्षी आमच्या गावच्या तलावाचा सांडवा कुणीतरी फोडतात. पाटबंधारे विभागाला लाखो रुपयांच्या पाणीपट्टी कर आम्ही भरणा करतो. उन्हाळ्यात शेतीला व ग्रामस्थांना पिण्याच्या पाण्याची टंचाई भासते.दहा ते बारा दिवसांपासून लाखो लिटर पाणी वाया जात असताना शाखाधिकारी तलावाकडे फिरकले देखील नाहीत. त्यामुळे पूर्ण भरलेल्या तलावातील पाणी पातळी कमी होण्याची वाट बघणार्‍या संबंधित शाखाधिकार्यावर वरिष्ठ अधिकार्‍यांनी गुन्हे दाखल करावेत. अशी आम्हा शेतकर्‍यांची मागणी आहे.
– उध्दव केकाण, ग्रामस्थ तथा शेतकरी चाटगाव.
