शंभूप्रेमींच्या संतापानंतर खुलासा
मुंबई (रिपोर्टर) राज्यात महापुरुषांच्या अपमानास्पद वक्तव्यावरून वादंग सुरू असून त्यावरुन विरोधक चांगलेच आक्रमक झाले आहेत. राज्य सरकारमधील नेतेच अवमान करत असल्याने त्याविरोधात विरोधकांनी उद्या महामोर्चाचं आयोजन केलं आहे. एकीकडे हा वाद सुरू असतानाच कालनिर्णयच्या दिनदर्शिकेत छत्रपती संभाजी महाराजांच्या राज्यभिषेकाच्या दिनाचा उल्लेख राहिला आहे. शंभूप्रेमींच्या संतापानंतर ही चूक लक्षात येताच कालनिर्णयने तातडीने ट्वीट करत दिलगिरी व्यक्त केली आहे.
कालनिर्णयने त्यांच्या ट्वीटर हँडलवरून हा खुलासा केला आहे. कालनिर्णय 2023च्या आवृत्तीमध्ये 16 जानेवारीला असणार्‍या धर्मवीर छत्रपती संभाजी महाराज राज्यभिषेक दिनाचा उल्लेख करण्याचे राहून गेले आहे. या पुढील कालनिर्णयच्या उर्वरित सर्व प्रतींमध्ये तसेच या पुढील सर्व आवृत्यांमध्ये हा उल्लेख केला जाईल. धर्मवीर छत्रपती संभाजी महाराज यांच्याविषयी आम्हाला अतीव आदर आहे. छत्रपती संभाजी महाराजप्रेमींच्या भावना अनवधानाने दुखावल्या गेल्या असल्यास आम्ही मनापासून दिलगीर आहोत, असा खुलासा कालनिर्णयने केला आहे.
तसेच कालनिर्णयने ही चूक पुन्हा न करण्याची हमी देखील दिली आहे. कालनिर्णयने केलेल्या ट्वीटला अनेकांनी लाईक्स देखील केलं आहे. तसेच अनेक कमेंट्सही केल्या आहेत तर काही जणांनी काही सूचना देखील केल्या आहेत. छापल्या गेलेल्या कॅलेंडरमध्ये सुधारणा करता येणार नाही. पण कालनिर्णय पमध्ये तुमचं कॅलेंडर आहे. कमीत कमी त्यात तरी तुम्ही बदल करु शकता, असा सल्ला देखील काहींनी दिला आहे. तर काहींनी कालनिर्णय घेणं बंद करत असल्याचं सांगत मोबाईलमधून अ‍ॅप डिलीट करत असल्याचं म्हटलं आहे. तर काहींना ही जाणीवपूर्वक केलेली चूक वाटत आहे.
