पत्नीला वाचविताना पतीचाही मृत्यू, केज तालुक्यातील घटना
केज (रिपोर्टर) पाणी तापण्याच्या हिटरचा पत्नीला शॉक लागला, तीला वाचविण्यासाठी धावलेल्या पतीलाही विजेचा जबर धक्का बसल्याने यामध्ये दोघांचाही जागीच मृत्यू झाल्याची घटना केज तालुक्यातील पिंपळगाव (घोळवे ) येथे आज पहाटे पावणे चारच्या दरम्यान घडली. यापूर्वीही याच कुटुंबातील एका मुलीचा पाण्यात बुडून मृत्यू झाला होता तर एका मुलीने गळफास घेवून आत्महत्या केली होती.
ज्ञानेश्वर आसाराम सुरवसे (वय 50) आणि इंदूबाई ज्ञानेश्वर सुरवसे (वय 45) अशी मृतांची नावे आहेत. ज्ञानेश्वर आसाराम सुरवसे हे पत्नी इंदूबाई आणि आईसह पिंपळगाव येथे राहतात. हे हलवाईचा व्यवसाय करत आहेत. आज पहाटे 4 वाजता झोपेतून उठल्यानंतर इंदुबाई या हिटर लावण्यासाठी पाण्याने भरलेली बकेट घेऊन विजेच्या बोर्डाकडे गेल्या. हिटर लावताच त्यांना विजेचा धक्का बसला. हे लक्षात येताच ज्ञानेश्वर यांनी त्यांना वाचविण्याचा प्रयत्न केला. मात्र, यात दोघा पती, पत्नीचा मृत्यू झाला. घटनेची माहिती मिळताच घटनास्थळी केज पोलीस ठाण्याचे सहाय्यक पोलीस निरीक्षक शंकर वाघमोडे यांच्या मार्गदर्शनाखाली बीट अमलदार पो. ना. आघाव, पो. ना. सोनवणे हे घटनास्थळी दाखल झाले. पंचनामा करून दोघांचेही मृतदेह उत्तरीय तपासणीसाठी विडा येथील प्राथमिक आरोग्य केंद्रात हलविण्यात आले. मृतांच्या पश्चात एक मुलगा, मुलगी आणि वयोवृद्ध आई आहेत. याघटनेमुळे परिसरात हळहळ व्यक्त करण्यात येत आहे.
यापूर्वी कुटुंबावर दोन आघात
सुरवसे दाम्पत्यांना 3 मुली आणि 1 मुलगा अशी 4 अपत्य होते. 12 वर्षांपूर्वी 1 मुलगी पाण्यात बुडून मृत्यू पावली होती, तर दुसरीने 5 वर्षा पूर्वी गळफास घेऊन आत्महत्या केली. तर एका मुलीचा विवाह झाला असून मुलगा बीडला शिक्षण घेत असल्याचे समजते.
