पिंपळनेरमध्ये नरवडेंची आत्महत्या तर महिलेचा मृतदेह विहिरीत
नरवडेंच्या आत्महत्येने खळबळ; लिहिलेली चिठ्ठी पोलिसांनी हस्तगत केली; नरवडेंच्या शर्टवरही काहींची नावे
पिंपळनेर (रिपोर्टर) पिंपळनेर येथील नरवडे यांच्या शेतातील विहिरीत एका महिलेचा मृतदेह आढळून आला तर त्याच शेतात मोहन बाबूराव नरवडे याने गळफास घेऊन आत्महत्या केल्याची खळबळजनक घटना प्रजासत्ताकदिनी घडली. शवविच्छेदनात महिलेचा पाण्यात बुडून मृत्यू झाल्याचे तर नरवडे यांचा गळफास लागल्याने मृत्यू झाल्याचे निदान झाले असून या प्रकरणी पिंपळनेर पोलिसात अद्याप पावेत कुठलाही गुन्हा दाखल झालेला नव्हता. नरवडे यांनी चिठ्ठी लिहून ठेवल्याचे सांगण्यात येत असून त्यांनी घातलेल्या कपड्यावरही काहींची नावे लिहिल्याचे पोलिसांनी सांगितले. सदरच्या घटनेचे गांभीर्य पाहून जिल्हा पोलीस उपअधिक्षक संतोष वाळके यांनी घटनास्थळाला भेट दिली तर पिंपळनेर पोलिस ठाण्याचे पोलीस निरीक्षक बाळासाहेब आघाव हे या प्रकरणात पुढील तपास करत आहेत.
याबाबत अधिक असे की, पिंपळनेर येथील रहिवासी मोहन बाबूराव नरवडे यांनी काल सकाळी आपल्या शेतातील एका झाडाला गळफास लावून आत्महत्या केली. घटनेची माहिती गावातील लोकांना होताच घटनास्थळी लोकांनी धाव घेतली. त्यावेळी पिंपळनेर पोलीस ठाण्याचे पो.नि. बाळासाहेब आघाव यांच्या अन्य टिमनेही धाव घेतली असता मोहन नरवडे यांच्या कपाळावर एक चिठ्ठी आढळून आली तर त्यांच्या अंगावरील शर्टवर काही जणांचे नाव लिहिल्याचे आढळून आल्याबाबत पोलिसांनी (पान 7 वर)
सांगितले. चिठ्ठीमध्ये कौसा विहिरीत पडली, तिचा मृत्यू झाला असेल, यासह अन्य मजकूर लिहिल्याचे सांगण्यात येते. आत्महत्येचं कारण अद्यापपर्यंत पोलीस सुत्रांनी सांगितलेले नाही. मोहन नरवडे यांच्यासह कौसाबाई भीमराव जाधव यांचा विहिरीत मृतदेह आढळल्याने गावात एकच खळबळ उडाली. या प्रकरणी अद्यापपर्यंत दोन्ही परिवाराच्या नातेवाईकांकडून कुठलीही तक्रार पोलीस ठाण्यात दाखल झालेली नव्हती. घटनेचे गांभीर्य पाहून काल जिल्हा पोलीस उपअधिक्षक वाळके यांनी घटनास्थळी भेट दिली. पिंपळनेर पोलीसांनी घटनास्थळाचा पंचनामा करत दोन्ही मृतदेह शवविच्छेदनासाठी पिंपळनेर येथील आरोग्य केंद्रात दाखल केले. शवविच्छेदनात कौसाबाई हिचा मृत्यू पाण्यात बुडून तर मोहन यांचा मृत्यू गळफास लागून झाल्याचे स्पष्ट झाले. मोहन यांनी लिहिलेली चिठ्ठी जिल्हा पोलीस उपअधिक्षक वाळकेंनी ताब्यात घेतली. आत्महत्येचे कारण अद्याप स्पष्ट झालेले नाही.
