वडझरीच्या निकालानंतर दोन सानपांच्या गटात मारामारी
पाटोदा (रिपोर्टर): वडझरी ग्रामपंचायतीसाठी काल मतदान झाल्यानंतर आज सकाळी मतमोजणीला सुरुवात झाली. या वेळी भाजपाचे संजय सानप यांच्या गटाचा विजय झाला. विजय उत्सव सुरू असताना संजय सानप व त्यांचे विरोधक अनुरथ सानप हे आमने-सामने आले. या दोन्ही गटात तुंबळ हाणामारी झाली. त्या दरम्यान पोलिसांनी सौम्य लाठीमार केला. या मारामारीमुळे काही काळ छत्रपती शिवाजी महाराज चौक परिसरामध्ये तणावाचे वातावरण निर्माण झाले होते. गोळीबाराची अफवाही पसरली होती.
वडझरी ग्रामपंचायतीसाठी भाजपाचे संजय सानप आणि धस यांच्या गटाचे अनुरथ सानप यांच्या गटात लढत झाली. काल वडझरी या ठिकाणी मतदान झाल्यानंतर आज सकाळी पाटोदा तहसीलमध्ये मतमोजणी झाली. या दरम्यान भाजपाचे संजय सानप यांच्या गटाच्या ताब्यात ग्रामपंचायत आली. सानप यांच्या गटाने विजय उत्सव साजरा करत छत्रपती शिवाजी महाराज चौक परिसरात आले असता त्याठिकाणी अनुरथ सानप यांच्या गटाचे आणि संजय सानप यांच्या गटाची तु तु मैमै होत मारामारी सुरू झाली. या वेळी काठीने आणि लाथाबुक्क्यांनी एकमेकांना मारामारी केली. त्या दरम्यान पोलिसांनी हस्तक्षेप करत सौम्य लाठीमार केला.
