सुसाईड नोट सापडली, आठ ओळीच्या पत्रात आयुष्याची आणि भविष्याची नोंद मांडली
कुणबी नोंद शोधण्यासाठी तरुण तहसिल कार्यालयात मारत होता चकरा
बीड (रिपोर्टर)ः- मराठा आरक्षणाचा लढा राज्यभरामध्ये तिव्र होत आहे. आरक्षण मिळावे यासाठी आतापर्यंत अनेक मराठा तरुणांनी आत्महत्या करुन आपले जिवन संपवले. बीड तालुक्यातील खापरपांगरी येथील एका तरुणांने रात्री आरक्षणासाठी गळफास घेवून आत्महत्या केली. गावात एकही कुणबी नोंद सापडत नाही. आता आपल्याला आरक्षण मिळणार नाही. आपल्या मुलाच्या शैक्षणीक भवितव्याचं कसं होणार या चिंतेतून चिट्ठी लिहून तरुणांने फाशी घेतली. या घटनेने सर्वत्र हळहळ व्यक्त करण्यात येत आहे. बीड ग्रामीण पोलीसांनी पंचनामा केला असून सदरील चिट्टी आपल्या ताब्यात घेतली आहे. आज सकाळी शोकाकूळ वातावरणात तरुणांवर अंत्यसंस्कार करण्यात आले.
सुसाईड नोट
बीड जिल्ह्यासह राज्यभरामध्ये अनेक गावात कुणबीच्या नोंदी सापडल्या आहेत. प्रत्येक गावात नोंदी शोधण्याचे काम चालू आहे. खापरपांगरी येथे एकही कुणबीची नोंद अद्यापपर्यंत सापडली नाही. कुणबीची नोंद शोधण्यासाठी बाळू ज्ञानदेव शेंडगे वय-44 वर्षे हा तरुण नेहमी तहसिल कार्यालयामध्ये चकरा मारत होता. मात्र नोंदी काही सापडत नव्हत्या. कुणबीची नोंद सापडेना, आता आपल्याला आरक्षण मिळणार नाही. मुलाच्या शैक्षणीक भवितव्याचं काय? आर्थीक परिस्थितीला सामोरे कसं जायचं? या चितेंतून रात्री बाळासाहेब (बाळू) ज्ञानेश्वर शेंडगे याने आपल्या राहत्या घरी गळफास घेवून आत्महत्या केली. सदरील हा प्रकार मध्यरात्री कुटूबीयांना दिसून आला. मध्यरात्रीचं मृतदेह जिल्हा रुग्णालयामध्ये आणण्यात आला होता. आत्महत्या करण्यापूर्वी त्याने चिट्टी लिहून ठेवली. त्या चिट्टीमध्ये असा उल्लेख आहे की, मी, बाळू ज्ञानदेव शेंडगे रा.खापरपांगरी आमच्या गावात कुणबी नोंदी न सापडल्याने आपल्याला मराठा आरक्षण मिळणार नाही. मी माझ्या आर्थीक परिस्थितीमुळे मी माझ्या मुलाला पुढे शिक्षण पण देवू शकणार नाही. माझ्या मुलाला मी शिकवू शकत नसल्याचे दुखः मला होत आहे. म्हणून मी माझे जिवन संपवत आहे. असा उल्लेख चिट्टीमध्ये करण्यात आला. मृतदेहाचे शवविच्छेदन जिल्हा रुग्णालयात करण्यात आले. बीड ग्रामीण पोलीसांनी पंचनामा करुन चिट्टी ताब्यात घेतली. सकाळी या तरुणांवर शोकाकूल वातावरणात अंत्यसंस्कार करण्यात आले. या तरुणाला एक मुलगा आणि एक अपंग मुलगी आहे. या घटनेने पांगरी येथे हळहळ व्यक्त केली जात आहे.