आत्महत्या की हत्या? परळी शहरात खळबळ
मयत पुण्याच्या सीआयडी विभागात पोलीस निरीक्षक म्हणून कार्यरत
परळी (रिपोर्टर): गेल्या काही महिन्यांपूर्वी बीड येथून बदली होऊन पुणे येथील सीआयडी विभागात कार्यरत असलेले पोलीस निरीक्षक सुभाष दुधाळ यांचा मृतदेह आज सकाळी परळी रेल्वे स्टेशन परिसरात उड्डाण पुलाखाली आढळून आला. मृतदेहाचे कमरेपासून अक्षरश: दोन तुकडे झाल्याचे निदर्शनास आले. रात्री पोलीस निरीक्षक दुधाळ यांनी रेल्वेगाडीखाली येऊन आत्महत्या केल्याची प्राथमिक माहिती समोर येत आहे. दुधाळ यांनी आत्महत्याच केली की अन्य काही प्रकार आहे. यावर चर्चा होत असून घडलेल्या घटनेने परळी शहरात खळबळ उडाली आहे.
याबाबत अधिक माहिती अशी की, परळी शहरातील रेल्वे स्टेशन परिसरातील उड्डाण पुलाखाली एका इसमाचे कमरेपासून दोन तुकडे झालेला मृतदेह काहींनी पाहिला. याची माहिती तात्काळ परळी स्टेान मास्तरला देण्यात आली. त्यांनी ही माहिती तात्काळ रेल्वे पोलिसांना दिल्यानंतर घटनास्थळी पोलीस निरीक्षक परमेश्वर सोले, पो.नि. साबळे, जमादार बाबासाहेब फड, राजू राठोड, सातपुतेंसह अन्य कर्मचार्यांनी घटनास्थळी धाव घेऊन पाहणी केली. तेव्हा पालथ्या अवस्थेत सदरील व्यक्तीचा मृतदेह घटनास्थळावर दिसून आला. पोलिसांनी जेव्हा त्याची ओळख करण्याचा प्रयत्न केला तेव्हा त्यांना धक्काच बसला. संबंधित व्यक्ती ही पोलीस खात्यात पोलीस निरीक्षक या पदावर काम करणारी असल्याचे लक्षात आले. संबंधित व्यक्तीचे नाव सुभाष दुधाळ असून ते गेल्या काही महिन्यांपूर्वी बीड येथे सीआयडी विभागात कार्यरत होते. गेल्या काही दिवसांपूर्वीच त्यांंची पुणे येथील सीआयडी विभागात पोलीस निरीक्षक पदावर बदली झाली होती. त्यांनी आत्महत्या का केली? हे अद्याप समजू शकले नसले तरी मृतदेहाजवळ एक चिठ्ठी आढळून आल्याचे सांगण्यात येते.