बीड (रिपोर्टर): महाविकास आघाडीचे उमेदवार बजरंग सोनवणे हे आज माजलगाव मतदारसंघात दौर्यावर आहेत. माजलगाव येथे आज सकाळी तरुणांनी मोठ्या उत्साहात मोटारसायकल रॅली काढून सोनवणे यांचे स्वागत केले. या वेळी सोनवणे यांनी ‘ही परिवर्तनाची नांदी आहे, बीड जिल्ह्याचा इतिहास बदलू, विकासाच्या नव्या वाटेवर चालण्यासाठी तुम्ही माझ्यासह सहभागी झालात, जिल्ह्याच्या कल्याणासाठी देह झिजवण्याची तयारी माझी आहे,’ असे बजरंग सोनवणे म्हणाले.
रॅलीला संबोधित करताना बजरंग सोनवणे म्हणाले की, ‘तुम्ही सर्वजण एवढ्या मोठ्या संख्येने आलात यातूनच माझा विजय निश्चित आहे. ही परिवर्तनाची नांदी आहे. बीड जिल्ह्याचा इतिहास आता नक्की बदलणार आहे, आणि तो आपण बदलून दाखवू, विकासाच्या नव्या वाटेवर चालण्यासाठी तुम्ही माझ्या सोबत आहात. यापेक्षा अधिक ते बळ दुसरे काय असेल, बीड जिल्ह्याचा विकास हेच माझे ध्येय असल्याने जिल्ह्याच्या कल्याणासाठी आपला देह झिजवण्यासाठी माझी तयारी आहे, तुम्ही सर्वजण फक्त साथ द्या आणि वेळप्रसंगी मला हाक द्या, हा बजरंग बप्पा संकटमोचका प्रमाणे तुमच्या पुढे कमरेवर हात ठेवून उभा राहिल्याशिवाय राहणार नाही.’