बीड (रिपोर्टर): उमेदवारी अर्ज भरण्याच्या काल शेवटच्या दिवसापर्यंत एकूण 75 उमेदवारांनी 99 उमेदवारी अर्ज दाखल केले आहेत. या अर्जांची आज छानणी जिल्हाधिकारी कार्यालयाच्या सभागृहात सुरू असून ज्या उमेदवारांनी सूचक, अद्यावत मतदारयादी, अर्जावर सही नसणे असे अर्ज आढळून आल्यास ते छानणीत बाद करण्यात येणार आहेत. ही छानणी आज दिवसभर चालणार असून येत्या 29 एप्रिलपर्यंत डमी अर्जांसह ज्यांना आपला उमेदवारी अर्ज माघे घ्यावयाचा आहे त्यांना तो उमेदवारी अर्ज मागे घेता येणार आहे.
बीड लोकसभेचे मतदान हे मतदानाच्या चौथ्या टप्प्यात असून ते 13 मे रोजी होणार आहे. 18 एप्रिलपासून 25 एप्रिलपर्यंत उमेदवारी अर्ज दाखल करण्याची प्रक्रिया सुरू होते. बीड लोकसभेसाठी सेना-भाजप आणि राष्ट्रवादी (अजित पवार) यांच्या गटाकडून माजी मंत्री पंकजा मुंडे यांनी आपला उमेदवारी अर्ज दाखल केला आहे. राष्ट्रवादी काँग्रेस (शरद पवार गट) कडून बजरंगबप्पा सोनवणे यांनी आपला उमेदवारी अर्ज दाखल केला आहे तर वंचीतकडून अशोक हिंगे यांनी उमेदवारी दाखल केली आहे. यांच्यासह एकूण 75 उमेदवारांनी 99 उमेदवारी अर्ज दाखल केलेले आहेत. यामध्ये अपक्षांचा मोठा सहभाग आहे. या सर्वांची छानणी सध्या सुरू असून दोषी अर्ज बाद करण्यात येणार आहेत. तर ज्या प्रमुख उमेदवारांनी आपले डमी अर्ज भरले आहेत त्यांना 29 एप्रिलपर्यंत आपले अर्ज मागे घेता येणार आहेत.