सकाळच्या सत्रात मतदान संथगतीने, एक वाजेपर्यंत 32 टक्क्यांच्या आसपास मतदान
हिंगोली/नांदेड/परभणी (रिपोर्टर): 2024 च्या लोकसभेसाठी दुसर्या टप्प्यात 13 राज्यात 88 जागांसाठी आज मतदान होत असून यामध्ये महाराष्ट्रातल्या अकोला, अमरावती, बुलढाणा, वर्धा, येवतमाळ-वाशीम, हिंगोली, नांदेड आणि परभणी या पश्चिम विदर्भातल्या पाच व मराठवाड्यातील तीन अशा एकूण आठ मतदारसंघाचा समावेश आहे. आज सकाळपासून या जागांसाठी मतदानाला सुरुवात झाली असून दुपारी एक वाजेपर्यंत 33 ते 38 टक्के मतदान झाले आहे. अकोल्यातून बाळासाहेब आंबेडकर, बुलढाण्यातून विद्यमान खासदार प्रतापराव जाधव, येवतामळमधून हेमंत पाटील यांच्या पत्नी राजश्री पाटील, वर्ध्यातून विद्यमान कासदार रामदास तडस, परभणीतून महादेव जानकर, नांदेडमधून प्रताप पाटील चिखलीकर यांचे भवितव्य पणाला लागले आहे.
2024 च्या लोकसभा निवडणुकीसाठी आज महाराष्ट्रात पश्चिम विदर्भातल्या पाच तर मराठवाड्यातल्या तीन जागांसाठी मतदानाला सुरुवात झाली आहे. मराठवाड्यातल्या नांदेड मतदारसंघात भाजपाकडून प्रतपाराव पाटील चिखलीकरांना काँग्रेस उमेदवार वसंत चव्हाण यांचे आव्हान आहे तर हिंगोलीत शिवसेना शिंदे गटाचे बाबूराव कदम कोहळीकर विरुद्ध उद्धव ठाकरे गटाचे नागेश पाटील ओटीकर, लोकसभेच्या मैदानात आपलं भवितव्य पणाला लावून आहेत. इकडे परभणीमध्ये महायुतीकडून राष्ट्रीय समाज पक्षाचे उमेदवार महादेव जानकर यांच्या विरोधात शिवसेना उद्धव ठाकरे गटाचे विद्यमान खासदार संजय जाधव हे मैदानात आहेत.
वर्ध्यामध्ये भाजपाचे विद्यमान खासदार रामदास तडस विरुद्ध राष्ट्रवादी काँग्रेस शरद पवार गटाचे अमर काळे यांचे भवितव्य मतपेटीत बंद होणार आहे. येवतमाळ-वाशिममधून खा. हेमंत पाटील यांच्या पत्नी राजश्री पाटील यांचा सामना उद्धव ठाकरे गटाचे संजय देशमुख यांच्या सोबत होत आहे. बुलढाण्यात शिंदे गटाचे विद्यमान खासदार प्रतापराव जाधव विरुद्ध उद्धव ठाकरे गटाचे नरेंद्र खेडेकर हे आमने-सामने असन अकोल्यात वंचीत बहुजन आघाडीचे सर्वेसर्वा प्रकाश आंबेडकर, भाजपाचे अनुप धोतरे, काँग्रेस उमेदवार डॉ. अभय पाटील, अमरावतीमध्ये खा. नवनीत राणा, काँग्रेसचे बळवंत वानखेडे,
बच्चू कडू यांच्या प्रहारकडून दिनेश बुब यांचे भवितव्य आज सायंकाळी मतपेटीत बंद होणार आहे. सकाळच्या पहिल्या सत्रात वर्धा 7.18, अकोला 7.17, अमरावती 6.34, बुलढाणे 6.61, हिंगोली 7.23, नांदेड 7.73, परभणी 9.72, येवतमाळ 7.23 टक्के मतादन झाले होते. दुपारी एक वाजेपर्यंत मताचा टक्का हा 33 ते 38 टक्क्यांपर्यंत गेल्याचे पहावयास मिळत होते. या आठ मतदारसंघात विद्यमान खासदारांसह अनेक मातब्बरांचे भवितव्य मतपेटीत बंद होणार आहे.