मुंबई (रिपोर्टर): राज्य विधीमंडळाच्या पावसाळी अधिवेशनाचा चौथा दिवस नीट परीक्षा आणि अन्य पेपर फुटी प्रकरणावरून चांगलाच गाजला. विरोधकांनी सकाळीच विधान भवनाच्या पायर्यांवर पेपरफुटी प्रकरणी निदर्शने करत घोषणाबाजी केली. तर विधानसभा आणि विधान परिषदेमध्येही नीट व पेपरफुटी प्रकरण प्रचंड गाजला. या वेळी उपमुख्यमंत्री देवेंद्र फडणविसांनी पेपर फुटीबाबतचा कायदा याच अधिवेशनात आणला जाईल, असे आश्वासन देत फेक नेरेटिव्ह म्हणजेच खोट्या बातम्या पसरवणार्यांविरोधात थेट गुन्हा दाखल करणार असल्याची घोषणा उपमुख्यमंत्री तथा गृहमंत्री देवेंद्र फडणविसांनी केली.
पावसाळी अधिवेशन संपण्यापूर्वी राज्याचा पेपर फुटीचा कायदा आणणार, अशी घोषणा राज्याचे उपमुख्यमंत्री देवेंद्र फडणवीस यांनी सोमवारी सभागृहात केली. सुरुवातीला मुद्दा मांडताना रोहित पवार म्हणाले की, पेपर फुटीबाबत सरकार कायदा करणार आहे का? केंद्राचा कायदा आला त्यांचं कौतुक आहे, तसा कायदा इथंही आणावा लागेल.
रोहित पवारांना उत्तर देतांना फडणवीस म्हणाले की, तलाठी परीक्षेत उत्तर चुकले होते, तिथं घोटाळा झाला नाही. पण आम्ही 1 लाख लोकांना पारदर्शी रोजगार दिला आहे. पेपरफुटीचा नरेटिव्ह सेट केला जातोय, आम्ही एक लाख लोकांना रोजगार दिला हा रेकॉर्ड आहे. पेपरफुटीबाबत कायदा करण्यासाठी आमचा मनोदय आहे, याच अधिवेशनात हा कायदा आणला जाईल, असं फडणवीस म्हणाले.पदभरतीच्या संदर्भातने बोलताना भास्कर जाधव म्हणाले की, आपण म्हणता पेपरफुटी पूर्वीच्या सरकारच्या काळात झाली, पण 2022-23 मध्ये अनेक भरतींचा पेपर फुटला, मग त्याला जबाबदार कोण? पेपरफुटी ही कीड आहे ती थांबवली पाहिजे.त्यावर देवेंद्र फडणवीसांनी उत्तर दिलं, भास्कर जाधव फेक नरेटिव्ह दाखवत आहेत. युवांमध्ये असंतोष कसा होईल यासाठी फेक नरेटिव्ह केलं जात आहे, पुण्यात एक वेबसाईट आहे ती हे पसरवण्याचं काम करते आहे. ती आता एका व्यक्तीनं टेकओव्हर केली आहे, मी गृहमंत्री आहे, सर्व गोष्टी माहिती असतात. शांत स्वभाव आहे म्हणून बोलत नाही असं नाही असं फडणवीस म्हणाले. तर राज्य सरकारच्या वतीने गट क च्या रिक्त पदांसाठी जी प्रक्रिया राबविली जाणार आहे ती महाराष्ट्र लोकसेवा आयोगाकडून राबविली जाणार असल्याची माहिती फडणविसांनी दिली. त्याचबरोबर खोट्या बातम्या पसरवणार्यांविरोधात थेट गुन्हा दाखल करणार असल्याचेही त्यांनी म्हटले.
