मुलीला गाईच्या गोठ्यात बांधले
केळी, टरबुजाच्या साली खायला दिल्या
संभाजीनगरच्या दामिनी पथकाकडून मुलीची सुटका
गेवराई (रिपोर्टर): जन्मत: गतीमंद असलेल्या पाच वर्षीय मुलीच्या आईचे निधन झाल्यानंतर बापाने दुसरे लग्न केले. गतीमंद असलेल्या मुलीकडे आई-वडिल दुर्लक्ष करत तिचा छळ करू लागले. शेवटी दारुड्या बापाने गेल्या काही दिवसांपासून त्या निष्पाप गतीमंद मुलीला जनावराच्या गोठ्यात बांधले. तिला केळी व टरबुजाच्या साली खायला देत राहिले. जेव्हा ही माहिती एका महिलेला कळली तेव्हा त्या महिलेने संभाजीनगर येथील हज हाऊस जवळील खलील अहमद यांच्या आश्रमात या मुलीला सोडण्यात आले. मुलीची प्रकृती आणि अवस्था बिकट असल्याने खलील अहमद यांनी तिच्यावर उपचार केले. सदरचे आश्रम हे मुलांचे असल्यामुळे या घटनेची माहिती संभाजीनगरच्या दामिनी पथकाला झाली. तेव्हा दामिनी पथकाने आश्रमात जाऊन मुलीला ताब्यात घेत तिचे पुनर्वसन केले. सदरचा प्रकार हा गेवराई शहरातला आहे. हा प्रकार उघडकीस आल्यानंतर सर्वत्र संताप आणि मुलीबाबत हळहळ व्यक्त केली जात आहे.
याबाबत अधिक असे की, गेवराई शहरामध्ये सुफिया (काल्पनिक नाव) ही पाच वर्षाची मुलगी जन्मत: अपंग होती. काही दिवसांपूर्वी तिच्या आईचे निधन झाले. वडील व्यसनी, त्यात त्याने दुसरे लग्न केले. वडिलांसाठी सुफिया ही डोईजड झाल्याने सुफिया हिस गाईच्या गोठ्यामध्ये तिच्या पायाला बांधून ठेवण्यात आले. दरम्यान पैठण येथील एक महिला ही माहेरी आलेली होती. तेव्हा तिला लहान मुलीच्या रडण्याचा आवाज आला. हा आवाज कुणाचा आहे? ती मुलगी का रडतेय? याची माहिती संबंधित महिलेने घेतली तेव्हा धक्कादायक प्रकार तिला माहित झाला. सुफियाची अवस्था बघवत नसल्याने आणि बापाला जाब विचारल्यानंतरही तो व्यवस्थीत उत्तर देत नसल्याने पैठणहून आलेल्या त्या महिलेला सुफियाबाबत मायेचा पाझर फुटला. तिने संभाजीनगरच्या हज हाऊस जवळील खलील अहमद यांच्या आश्रमात त्या मुलीला सोडले. तिथे तिच्यावर योग्य उपचार झाले. परंतु आश्रमात केवळ मुलेच असल्याने त्या मुलीची माहिती संभाजीनगरच्या दामिनी पथकाला देण्यात आली. तेव्हा काल दामिनी पथक आश्रमात डेरेदाखल झाले. पथकातील उपनिरीक्षक कांचन मिरधे, अंमलदार निर्मला निंभोरे, लता जाधव, सरिता कुंडारे, अंबिका दारुमटे, प्रियंका भिऊसेन, मनीषा बनसोडे, पुजा जाधव या सर्वांनी कायदेशीर बाबी तपासून सुफियाचे पुनर्वसन केले. सदरचा प्रकार हा गेवराई शहरात घडल्याने एकच खळबळ उडाली आहे.
