मयतात दोन महिलांचा समावेश, अपघात एवढा भीषण रिक्षा पन्नास फूट फेकला गेला, आयशर टेम्पोसह चालक फरार, रात्री अकरा वाजता माजलगाव-तेलगाव रोडवर घडली घटना
माजलगाव (रिपोर्टर): तेलगावकडून माजलगावकडे रिक्षाने जात असलेल्या प्रवाश्यांना समोरून येणार्‍या भरधाव आयशर टेम्पोने जोराची धडक दिल्याने झालेल्या भीषण अपघातात पती-पत्नीसह पाच जण जागीच ठार झाले. तर यात अन्य तिन ते चार जण जखमी असून जखमींना माजलगाव येतील रुग्णालयात उपचारासाठी दाखल करण्यात आले आहे. तर एका महिलेस संभाजीनगर येथे हलविण्यात आले आहे. उपचारा दरम्यान आज सकाळी संभाजीनगर येथे महिलेचा दुर्दैवी मृत्यू झाल्याचे सांगण्यात येते. हा अपघात एवढा भयानक होता की, आयशर टेम्पोने रिक्षाला धडक दिल्यानंतर रिक्षा 50 ते 60 फूट दूर फेकला गेला. हा अपघात रात्री अकराच्या सुमारास मेहकर-पंढरपूर या पालखी महामार्गावरील तेलगाव रस्त्यावर असलेल्या नित्रूड जवळच्या एका पेट्रोल पंपासमोर घडला. याच रस्त्यावर काल अन्य एक अपघात झाला होता. त्यामध्ये एक ठार झाल्याचे सांगण्यात येते.
माजलगाव तालुक्यातील भाटवडगाव येथील काही रहिवासी तेलगावकडून रिक्षा (क्र. एम.एच. 23 एन. 0273) यामध्ये बसून माजलगावकडे जात होते. रात्री अकराच्या सुमारास त्यांची रिक्षा नित्रूड पेट्रोल पंपासमोर आली असता समोरून आयशर टेम्पो (क्र. एम.एच. 23 एम. 9255) हा भरधाव वेगात आला आणि त्याने रिक्षाला जोराची धडक दिली. ही धडक एवढी भीषण होती की, रिक्षा जवळपास 50 ते 60 फूट दूर फेकला गेला. त्यामुळे रिक्षामध्ये बसलेले प्रवासी काही रिक्षा बाहेर फेकले गेले तर काही रिक्षातच अडकले. या अपघातात फारूक चांद सय्यद, त्यांची पत्नी सय्यद शबाना फारूक, शेख नोहिद एजाज यांच्यासह अन्य एका व्यक्तीचा मृत्यू झाला. यात तीन ते चार जण जखमी असून जखमींना माजलगाव येथील रुग्णालयात उपचारासाठी दाखल करण्यात आले आहे. त्यापैकी सराहा अनवर पठाण (रा. भाटवडगाव) यांना संभाजीनगर येथील रुग्णालयात उपचारासाठी दाखल करण्यात आले आहे. मात्र आज सकाळी उपचार घेत असताना त्यांचा दुर्दैवी मृत्यू झाला. या अपघातात सकाळपर्यंत पाच जण मृत्युमुखी पडल्याचे सांगण्यात येते. राि या अपघाताची माहिती िदिंद्रुड पोलीस ठाण्याचे सहाय्यक पोलीस निरीक्षक महादेव ढाकणे यांना झाल्यानंतर त्यांच्यासह पोलीस कर्मचारी महेश साळुंखे, खालील मोमीन, सचीन गायकवाड, कानदास बनसोडे आदींनी घटनास्थळी धाव घेतली. रिक्षाला धडक दिल्यानंतर आयशर टेम्पो चालक घटनास्थळावरून पसार झाला. पोलीस त्याचा शोध घेत आहेत. रात्री अपघातात मृत्युमुखी पडलेल्या चारही जणांच्या मृतदेहाचे शवविच्छेदन दुपारी एक वाजता चालू होते. या अपघाताने भाटवडगाव गावावर शोककळा पसरली आहे.
माजलगाव-तेलगाव रस्ता यमाचे द्वार
मेहकर-पंढरपूर पालखी महामार्गावरील माजलगाव-तेलगाव हा रस्ता वाहन चालकांसाठी साक्षात यमाचे द्वार ठरत आहे. रस्त्यात मोठमोठ्या भेगा पडल्याने मोटारसायकलचे चाक त्यामध्ये अडकऊन अनेकजण मृत्युमुखी पडले आहेत. काल या रस्त्यावर दुचाकीस्वारास ट्रकने धडक दिल्याने महारुद्र लोंढे यांचा जागीच मअत्यू झाला तर त्यांच्या पत्नी यात जखमी झाल्या होत्या. त्यानंतर रात्री रिक्षा आणि आयशर टेम्पोचा अपघात होऊन पाच जण ठार झाले आहेत.
