संघर्षातून झाला पुणे पोलिसात दाखल
अठरा विश्वांच्या दारिद्र्यावर मात करत साकारलं पोलीस होण्याचं स्वप्न
बीड, (रिपोर्टर)ः- यशाला गवसणी घालायची असेल, तर संघर्ष अटळ आहे – हे सिद्ध करून दाखवलं आहे करीम या तरुणाने. आयुष्याच्या प्रत्येक वळणावर संकटांचा डोंगर उभा असतानाही त्याने हार मानली नाही. आई-वडील दोघांचेही छत्र हरवले, घर नाही, नातलगांचा आधार नाही, तरीही जिद्द आणि मेहनतीच्या जोरावर आज तो पुणे पोलिस दलात दाखल झाला आहे.
करीमच्या आयुष्यात दु:खांची मालिका होती. पाच वर्षांपूर्वी आईचे निधन झाले, तर वर्षभरापूर्वी वडीलही या जगातून गेले. अनाथ झालेल्या करीमला नातलगांनी साथ दिली नाही, उलट टोमणे मारत दूर राहिले. पण करीम खचला नाही. स्वतःचं काहीतरी करायचं या निर्धाराने त्याने पोलीस भरतीसाठी तयारी सुरू ठेवली.
या प्रवासात त्याला खर्या अर्थाने साथ मिळाली ती त्याच्या जिवलग मित्रांकडून. त्यांच्या मदतीनेच त्याचं जेवण, राहण्याचा खर्च आणि भरती प्रक्रियेसाठी लागणारा प्रवासखर्च भागवला जात होता. त्यांच्या प्रोत्साहनामुळेच करीमने हार न मानता प्रयत्न सुरू ठेवले.
गेल्या वर्षी तो कोतवाल म्हणून निवडला गेला होता, पण त्याचं स्वप्न होतं पोलिस होण्याचं. अनेक अपयशांनंतरही त्याने प्रयत्न सुरू ठेवले आणि अखेर तीन महिन्यांपूर्वी पुणे पोलिस दलात त्याची निवड झाली. प्रशिक्षण पूर्ण करून तो नुकताच गावी परतला, जिथे पिंपळनेर ग्रामपंचायत, ग्रामस्थ आणि मित्रपरिवाराच्या वतीने त्याचा सत्कार करण्यात आला.करीमची कहाणी ही केवळ यशाची नाही, तर संघर्ष, जिद्द आणि आशेची प्रेरणा देणारी आहे. त्याचं यश आज असंख्य तरुणांसाठी दिशादर्शक ठरत आहे.
शेवटी एक संदेश:
परिस्थिती नव्हे, तर प्रयत्नच माणसाचं भविष्य ठरवतात – आणि करीम हेच आज सिद्ध करून दाखवत आहे.
