बीड (रिपोर्टर): बीड जिल्ह्यातल्या गेवराई, अंबाजोगाई, धारूर या तीन नगरपालिकांमध्ये पक्षीय पातळीवर उमेदवार्या दाखल झाल्या आहेत. त्यापाठोपाठ अपक्षांनीही याठिकाणी उमेदवारी अर्ज दाखल केले. त्यातील बहुतांशी अपक्ष हे पक्षांसाठी डोकेदुखी ठरू पाहत असल्याने या तिन्ही ठिकाणी त्यांच्या उमेदवार्या मागे घेण्यासाठी प्रयत्न केले जात असल्याचे दिसून येते. अंबाजोगाई आणि गेवराईत सरळ लढती पहावयास मिळत असल्या तरी अन्य पक्षांचे उमेदवार सरळ लढतीमध्ये मोठ्या प्रमाणावर मत खाऊ शकतात. त्या दृष्टीने अंबाजोगाई आणि गेवराईत आमने-सामने आलेले सरळ लढतीतील उमेदवार प्रयत्न करताना दिसून येतात.
गेवराई नगरपालिका निवडुकीसाठी सर्वप्रथम उमेदवारांची घोषणा अजितदादांची राष्ट्रवादी आणि भाजपाकडून करण्यात आली. गेल्या आठ दिवसांपासून भाजपा उमेदवार गीता बाळराजे पवार आणि अजितदादांच्या राष्ट्रवादीचे उमेदवार शीतल दाभाडे यांचा प्रचार सुरू असला तरी अन्य पक्षांचे उमेदवारही रिंगणात उतरले. त्यांनीही तेवढ्याच ताकतीने प्रचार सुरू केला. त्यामुळे आपली मते कोण खातो? त्याची मनधरणी करायला इथे सुरुवात झाली आहे. तिकडे अंबाजोगाईमध्ये भाजपाकडून प्रथमच नंदकिशोर मुंदडा आणि अजितदादांच्या राष्ट्रवादीकडून पापा मोदी हे निवडणूक रिंगणात आहेत. दोघेही मातब्बर असल्याने ही निवडूक चुरशीची होणार आहे. त्यामुळे मुंदडा आणि मोदींकडून अत्यंत सावध प्रचार सुरू आहे. त्याचबरोबर आपल्याला कोण अडचणीत आणू शकतो, अशा उमेदवारांना गोंजारणे या दोघांकडून सुरू झाले आहे. धारूरमध्ये अपक्षांची डोकेदुखी मोठ्या प्रमाणावर वाढल्याचे सांगितले जाते.
