; अपघाती मृत्यूचा बनाव उघडकीस, ३ दिवसांत गुन्ह्याचा उलगडा
बीड, प्रतिनिधी : अंजनवती येथील दशरथ परदेशी (वय ४५) आणि धीरज येडे (वय २६) यांनी एका व्यक्तीचा खून करून तो अपघाती मृत्यू असल्याचा बनाव रचल्याचे तपासात निष्पन्न झाले असून, नेकनूर पोलिसांनी कोणताही ठोस सुगावा नसताना अवघ्या तीन दिवसांत या गंभीर गुन्ह्याचा उलगडा करत दोन्ही आरोपींना तळोजा परिसरातून ताब्यात घेतले आहे. या उल्लेखनीय कामगिरीमुळे नेकनूर पोलिसांचे सर्वत्र कौतुक होत आहे.
मयताचा मृतदेह त्याच्या वाहनासह रस्त्यालगत आढळून आल्याने प्रथमदर्शनी हा अपघाती मृत्यू असल्याचे चित्र निर्माण करण्यात आले होते. मात्र घटनास्थळावरील परिस्थिती, शवविच्छेदन अहवाल आणि इतर तांत्रिक पुराव्यांमध्ये विसंगती आढळल्याने पोलिसांनी तपास अधिक सखोल पद्धतीने सुरू ठेवला. तपासादरम्यान हा मृत्यू अपघाती नसून खून असल्याचे निष्पन्न झाले.
मा. पोलीस अधीक्षक नवनीत कावंत, अपर पोलीस अधीक्षक चेतना तिडके तसेच उपविभागीय पोलीस अधिकारी वेंकटराम यांच्या मार्गदर्शनाखाली नेकनूर पोलीस स्टेशनच्या पथकाने रात्रंदिवस मेहनत घेतली. मोबाईल कॉल डिटेल रेकॉर्ड (सीडीआर), लोकेशन विश्लेषण, सीसीटीव्ही फुटेज, साक्षीदारांचे जबाब आणि तांत्रिक माहितीचे बारकाईने विश्लेषण करण्यात आले.
तपासात आरोपींनी पुरावे नष्ट करून पोलिसांची दिशाभूल करण्याचा प्रयत्न केल्याचे समोर आले. मात्र पोलिसांनी विविध धागेदोरे जोडत आरोपींच्या हालचालींचा मागोवा घेतला. गोपनीय माहिती व तांत्रिक विश्लेषणाच्या आधारे आरोपी फरार झाल्याचे स्पष्ट झाल्यानंतर विशेष पथके रवाना करण्यात आली. अखेर तळोजा परिसरातून दोन्ही आरोपींना ताब्यात घेण्यात आले.
या कारवाईत स्थानिक गुन्हे शाखा, बीड, तळोजा पोलीस स्टेशनचे सपोनि निलेश येवले व त्यांचे पथक, टेक्निकल सेलचे तिकी सुरवसे तसेच इतर यंत्रणांचे मोलाचे सहकार्य लाभले.
सदरची कारवाई नेकनूर पोलीस स्टेशनचे प्रभारी अधिकारी तथा तपास अधिकारी सपोनि मंगेश साळवे यांच्या नेतृत्वाखाली पार पडली. यामध्ये सफौ. संजय गुंड, दत्ता बळवंत, विशाल क्षीरसागर, मन्सूर शेख, गणेश परजने, बाबासाहेब साळुंखे, बालाजी ढाकणे व सुधाकर जायभाये यांनी महत्त्वपूर्ण भूमिका बजावली.
अपघाताचा बनाव रचून खून लपविण्याचा प्रयत्न करणाऱ्या आरोपींना अवघ्या ७२ तासांत जेरबंद करून गुन्ह्याचा उलगडा करण्यात आल्याने ही कारवाई नेकनूर पोलिसांच्या तपास कौशल्याचे उत्तम उदाहरण ठरली आहे.
