बीड (रिपोर्टर) बाहेरून पोट भरण्यासाठी आलेल्या अनेकांना येथील भुरटे दादागिरी करतात त्यामुळे बीड महाराष्ट्र नव्हे तर देशाच्या कानाकोपर्यात बदनाम होत आहे. बीडमध्ये गेल्या काही दिवसांपासून सर्कस ग्राऊंडवर सुपरस्टार सर्कसचे शो सुरू आहेत मात्र यात भरटे दादागिरी करत आहेत. आम्हाला आणि आमच्या सहकार्यांना आतमध्ये फुकट सोडा म्हणून सर्कसच्या गेटवरील कामगारांना मारहाण करतात. अशी खंत व्यक्त करत सर्कस जीवंत ठेवण्यासाठी प्रेक्षकांनी भरभरून प्रतिसाद द्यावा, असे आवाहन सर्कसप्रमुख प्रशांत माने यांनी केले. ते सर्कस ग्राऊंड येथे आयोजीत पत्रकार परिषदेत बोलत होते.
बीड येथे गेल्या काही दिवसांपासून सुपरस्टार सर्कस आलेली आहे. या सर्कसचे प्रमुख प्रशांत माने यांनी आज पत्रकार परिषदेचे आयोजन केले होते. या वेळी बोलताना ते म्हणाले की, मी महाराष्ट्रासह देशाच्या कानाकोपर्यात सर्कसचे शो आयोजीत केले आहे मात्र बीड सारखा कटू अनुभव मला कुठे आला नाही. येथील प्रेक्षक मोठ्या मनाचे आहेत ते भरभरून प्रतिसाद देतात मात्र काही लोक आम्हाला त्रास देत आहेत. आमच्या गेटवरील सहकार्यांना त्यांनी मारहाण केली. तुम्हाला कोणाकडे जायचे तर जा, मग तुमचा शो कसा होता हे आम्ही पाहू, असे धमकावले जाते, आमची सर्कस 1937 पासूनची आहे. माझे आजोबा, वडील, चुलते, आत्या हे सर्व सर्कसमध्ये होते. माझ्या वयाच्या दुसर्या वर्षी वडील गेले, कोरोना काळात जगात सर्वांचे नुकसान झाले, मात्र सर्वात मोठा फटका आम्हाला बसला. आम्ही वीस वर्षे यात मागे गेलो. कोरोना पुर्वी आमच्याकडे दोनशे कलाकार होते मात्र कोरोनात 50 ठेवले. त्यांना जगवणे नाकीनऊ आले होते. आता शंभर कलाकार आहेत. सर्व शाळांना 50 रुपये प्रति विद्यार्थी फी असणार आहे.
प्राणी, बाल कलाकारांवर बंदी
आणल्याने सर्कस कालबाह्य होणार
सर्कसचा आत्माच प्राणी आहे मात्र शासनाने यावर बंदी आणली. त्यामुळे अर्ध्याहून अधिक प्रेक्षकांनी याकडे पाठ फिरवली. त्यानंतर बाल कलाकारांवरही बंद आणली. त्यामुळे बालवयात कलाकार घडतो, पंधरा वर्षापुढे त्याचे अंग वळत नाही त्यामुळे नवीन कलाकार घडणे आता शक्य नाही. सर्कसचा शो आयोजन करण्यापुर्वी किचकट आणी आर्थिकदृष्ट्या खर्चीक परवानग्या घ्याव्या लागत्यात. त्यामुळे आता सर्कस कालबाह्य होण्याच्या मार्गावर आहेत. मीही दोन-तीन वर्षात सर्कस बंद करणार आहे. कोरोनानंतर देशातील 13 सर्कस बंद पडल्या. त्यात महाराष्ट्रातील तीन आहेत सध्या महाराष्ट्रात पाच सर्कस आहेत.
