बीड (रिपोर्टर) बीडसह जिल्हाभरातील क्रिकेट चाहत्यांचे लक्ष लागून असलेल्या रिपोर्टर प्रिमिअर लिग (आरपीएल) चे 24 जानेवारी रोजी थाटात उद्घाटन होणार आहे. श्रीमंतयोगी छत्रपती शिवाजी महाराज जिल्हा क्रीडांगणावर सदरची क्रिकेट स्पर्धा होत असून या स्पर्धेत जिल्ह्यासह जिल्हाबाहेरील संघांनी उत्स्फूर्तपणे सहभाग नोंदवला आहे. गेल्या काही वर्षांपासून सायं. दैनिक बीड रिपोर्टर आरपीएलचे आयोजन करत आहे.
सायं. दैनिक बीड रिपोर्टरच्या वतीने प्रत्येक वर्षी बीडच्या श्रीमंत योगी छत्रपती शिवाजी महाराज जिल्हा क्रीडांगणावर आरपीएल (रिपोर्टर प्रिमिअर लिग)चे आयोजन करण्यात येते. सदरच्या स्पर्धेमध्ये जिल्ह्यासह जिल्हाबाहेरून चांगले संघ सहभाग नोंदवत असल्याने क्रिकेट पाहण्यासाठी शहरासह जिल्हाभरातील क्रिकेट चाहते क्रिडांगणावर येत असतात. आरपीएलबाबत क्रिकेट चाहत्यात मोठी उत्सुकता असते. यावर्षी आरपीएल 24 जानेवारीपासून सुरू होत असून या स्पर्धेत जिल्ह्यासह जिल्हाबाहेरील 12 संघांनी सहभाग नोंदवला आहे. आयपीएलच्या धर्तीवर आरपीएल बीडमध्ये खेळवलं जातं. या 12 संघांचे वेगवेगळे ओनर असून प्रत्येक ओनरने आपल्या संघात तीन ते चार खेळाडू उच्चदर्जाचे घेतलेले आहेत. त्यामुळे आरपीएलमध्ये मोठी चुरस क्रिकेट चाहत्यांना प्रत्येक सामन्यामध्ये पहायला मिळणार आहेत. सदरच्या चुरशीच्या सामन्यांचे क्रिकेट चाहत्यांनी साक्षीदार व्हावे, असे आवाहन रिपोर्टर क्रिडा अकॅडमीच्या वतीने करण्यात आले आहे.
बीडच्या खेळाडुंना
प्रोत्साहीत करण्यासाठी आरपीएल
सर्वक्षेत्रात आघाडीवर असलेल्या बीड जिल्ह्यातील तरुण खेळाडुंना क्रीडाक्षेत्रातही जिल्हा, राज्य आणि देशपातळीवर नाव कमावता यावं, राज्यासाठी, देशासाठी खेळता यावं हा उद्देश डोळ्यांसमोर ठेवून सायं. दैनिक बीड रिपोर्टर व रिपोर्टर क्रीडा अकॅडमीच्या वतीने दरवर्षी रिपोर्टर प्रिमिअर लिगचे आयोजन करण्यात येते. सामाजीक बांधिलकी आणि क्रीडा
क्षेत्रातल्या खेळाडुंना प्रोत्साहन देण्याहेतू आरपीएल घेण्यात येत असल्याचे
अकॅडमीचे सर्वेसर्वा शेख तय्यब यांनी सांगितले.