विक्रम काळे, किरण पाटलांसह उमेदवारांचे भवितव्य मतपेटीत; दुपारपर्यंत बीड जिल्ह्यात 3 हजार 90 मतदारांनी केले मतदान

मतदारसंघातल्या अन्य जिल्ह्यात कुठे 30 तर कठे 35 टक्क्यांपर्यंत
मतदान
बीड (रिपोर्टर) मराठवाडा शिक्षक मतदार संघासाठी आज सकाळपासून मतदानाला सुरुवात झाली असून बीडसह मतदारसंघातल्या अन्य जिल्ह्यातील मतदानाची टक्केवारी दुपारी बारा वाजेपर्यंत कुठे 30 तर कुठे 35 टक्क्यापर्यंत गेल्याचे दिसून येत असून बीड जिल्ह्यात 9 हजार 708 मतदानापैकी 3 हजार 90 मतदान दुपारी बारा वाजेपर्यंत प्रत्यक्षात झाले होते. या निवडणुकीमध्ये गेले तीन टर्म या मतदारसंघाचे नेतृत्व करणारे विक्रम काळे यांना शह देण्यासाठी भाजपाने प्रा. किरण पाटील यांना उभे केले. त्यामध्ये मराठवाड्यातल्या काही जिल्ह्यात राष्ट्रवादीतील काहींनी बंडखोरी केल्यामुळे या निवडणुकीला अधिक महत्व प्राप्त झाले असून आज सायंकाळी काळे, पाटीलसह अन्य उमेदवारांचे भवितव्य मतदान यंत्रात बंद होणार आहे.
गेल्या पंधरा वर्षांपासून या मतदरासंघाचे नेतृत्व विक्रम काळे हे करत आहेत. यावर्षी राष्ट्रवादीतील काहींनी बंडखोरी केली तर बीड जिल्ह्यात संस्थानिक म्हणून ओळख असलेले माजी मंत्री जयदत्त क्षीरसागर यांनी भाजपाच्या उमेदवाराला जाहीर पाठींबा दिला. त्यामुळे शेवटच्या टप्प्यात या निवडणुकीत अधिक चुरस निर्माण झाल्याचे पहावयास मिळते. गेल्या पाच वर्षांपूर्वी विक्रम काळे हे 25 हजारापेक्षा जास्त मतांनी विजयी झाले होते. या वेळेस या मतदारसंघावर आपले वर्चस्व निर्माण व्हावे यासाठी भाजपाकडून किरण पाटील यांना उमेदवारी दिली. आज प्रत्यक्षात बीडसह मतदारसंघातील अन्य जिल्ह्यात मतदानाला सुरुवात झाली आहे. बीड जिल्ह्यातल्या 34 बुथमध्ये एकूण 9 हजार 708 मतदानापैकी दुपारी साडेबारा वाजेपर्यंत 3 हजार 90 एवढे मतदान झाले. टक्क्यात या मताचा आकडा 31.83 वर जातो तर मतदारसंघातल्या अन्य जिल्ह्यांमध्ये कुठे 30 तर कुठे 35 टक्क्यांपर्यंत मतदान झालेले होते. आज सायंकाळी आघाडीचे उमेदवार विक्रम काळे, भाजपाचे किरण पाटील यांच्यासह अन्य पक्ष आणि अपक्ष उमेदवारांचे भवितव्य मतदान यंत्रात बंद होणार आहे.