गेवराई/बीड (रिपोर्टर) ऊसतोडणीचे पैसे दारूवर का उडवता ? असा जाब विचारणार्या पत्नीच्या डोक्यात दगड घालून पतीने निर्घृणपणे खून केल्याची थरारक घटना मध्यरात्री भेंडटाकळी तांडा येथे रात्री घडली. मयत महिलेच्या मृतदेहाचे बीडच्या जिल्हा रुग्णालयात शवविच्छेदन करण्यात आले. या प्रकरणी पतीसह अन्य दोन जणांविरोधात तलवाडा पोलीस ठाण्यात गुन्हा दाखल करण्याची प्रक्रिया सुरू होती. या घटनेने गेवराई तालुक्यात एकच खळबळ उडाली.
सविता राठोड (वय 36 वर्षे) आणि सुरेश राठोड हे पती-पत्नी ऊसतोडणीला गेलेले होते. काल नातेवाईकांच्या लग्नानिमित्त ते भेंडटाकळी तांडा या आपल्या गावी आले होते. रात्री पती-पत्नीमध्ये पैशाच्या कारणावरून वाद निर्माण झाला. ऊसतोडणीचे पैसे दारूमध्ये का उडवता, असा जाब पत्नीने पती सुरेश राठोड याला विचारला असता पतीने सविता हिच्या डोक्यात दगड घालून तिचा निर्घृणपणे खून केला. सदरील हा प्रकार नातेवाईकांच्या निदर्शनास आल्यानंतर सविता राठोड हिचा मृतदेह जिल्हा रुग्णालयामध्ये आणण्यात आला होता. आज सकाळी मृतदेहाचे शवविच्छेदन करण्यात आले. या प्रकरणी सविताचा भाऊ विलास बाबूराव चव्हाण (रा. कुरण तांडा तालखेड ता. माजलगाव) याने सुरेश गुलाबराव राठोड (पती, वय 45 वर्षे), भगवान राठोड (दिर), विनोद राठोड (पुतण्या) या तिघांविरोधात तलवाडा पोलीस ठाण्यात तक्रार दाखल केली आहे. घटनास्थळी तलवाडा ठाण्याचे प्रमुख शंकर वाघमोडेंसह कर्मचारी दाखल झाले होते.