तात्काळ अटक करा नसता तीव्र आंदोलन; जिल्हाधिकारी, एसपींना कर्मचार्यांचे निवेदन
बीड (रिपोर्टर) पालकमंत्री अतुल सावे यांच्या नावावर प्रशासनातील कर्मचार्यांसह अधिकार्यांना दाबदडप करणारे तथा जिल्हा परिषदेचे सीईओ अजित पवार यांच्या कक्षात जावून त्यांना आई-माईवर शिवीगाळ करणारे धनराज मुंडे यांना तात्काळ अटक करा, या मागणीसाठी जिल्हा परिषदेतल्या सर्वच विभागातल्या कर्मचार्यांनी सदरच्या घटनेचा जाहीर निषेध करत संबंधित व्यक्तीस तात्काळ अटक न झाल्यास तीव्र स्वरुपाचे आंदोलन करण्याचा इशारा दिला आहे.
याबाबत अधिक असे की, काल पाच वाजण्याच्या सुमारास जिल्हा परिषदेचे मुख्य कार्यकारी अधिकारी अजित पवार यांच्या कक्षेमध्ये धनराज मुंडे आले, काही गुत्तेदारीच्या कामावरून धनराज मुंडे यांनी अजित पवार यांना थेट अश्लाघ्य भाषेत शिवीगाळ करण्यास सुरुवात केली. पालकमंत्री अतुल सावे यांचे आपण निकटवर्तीय आहोत, खासगी स्वीयसहाय्यक आहोत, असे सांगत धनराज मुंडे हे प्रशासनातील अधिकारी, कर्मचार्यांना सातत्याने वेठीस धरून अपमानीत करतात. काल त्यांनी थेट सीईओ अजित पवार यांनाच लक्ष्य करून दादागिरी करत शिवीगाळ केली. या प्रकरणी सीईओंच्या तक्रारीवरून संबंधितावर गुन्हा दाखल करण्यात आला आहे. मात्र पोलीस यंत्रणेने अद्यापर्यंत धनराज मुंडे यांना अटक केली नाही. त्यामुळे संतापलेल्या जिल्हा परिषदेच्या कर्मचार्यांनी आज एकत्रित येऊन सदरच्या घटनेचा निषेध करत जिल्हाधिकारी दीपा मुंडे व जिल्हा पोलीस अधिक्षक नंदकुमार ठाकूर यांची भेट घेऊन धनराज मुंडे यास तात्काळ अटक करण्याची मागणी केली. सदरील व्यक्तीस तात्काळ अटक न केल्यास बीड जिल्हा परिषदेच्या सर्व विभागातील अधिकारी, कर्मचारी तीव्र आंदोलन उभा करतील, असा इशाराही त्यांनी निवेदनात दिला आहे. तर 15 मेपासून लेखणीबंद आंदोलन केले जाणार असल्याचे म्हटले आहे. सदरच्या निवेदनावर जि.प. लेखा विभाग कर्मचारी संघटना, जि.प. कर्मचारी संघटना, महाराष्ट्र राज्य ग्रामसेवक युनियन डीएनई, महाराष्ट्र राज्य जिल्हा परिषद कर्मचारी महासंघ, महाराष्ट्र राज्य जिल्हा परिषद कर्मचारी महासंघ या संघटनांच्या पदाधिकार्यांच्या स्वाक्षर्या आहेत.