रस्त्यावर साचलेल्या पाण्याचा अंदाज न आल्याने घडली घटना
बीड (रिपोर्टर) प्रसुतीसाठी अंबाजोगाईच्या स्वाराती रुग्णालयात एका गर्भवतीला दाखल केल्यानंतर परत गावाकडे निघालेल्या रुग्णवाहिका चालकाला रस्त्यावर साचलेल्या पाण्याचा अंदाज न आल्याने रुग्णवाहिका रस्त्याच्या खाली जावून पलटी झाली. या अपघातात चालक जागीच ठार झाल्याची घटना परळी-गंगाखेड रोडवर आज सकाळी पावणे नऊ वाजता घडली. घटनेची माहिती मिळताच घटनास्थळी परळी ग्रामीण पोलीस ठाण्याचे सहायक पोलीस निरीक्षक मारुती मुंडे यांनी घटनास्थळी धाव घेतली.
चिलगरवाडी ता. गंगाखेड येथील एका महिलेला प्रसुतीच्या वेदना होत असल्याने सकाळीच तिला खासगी अ‍ॅम्ब्युलन्सने स्वाराती रुग्णालयात दाखल करण्यात आले. यानंतर अ‍ॅम्ब्युलन्स चालक गजानन चिलगर (रा. चिलगरवाडी ह.मु. गंगाखेड, वय 26 वर्षे) हा परत गंगाखेडकडे अ‍ॅम्ब्युलन्स घेऊन निघाला होता. सततच्या संततधारीने परळी-गंगाखेड रोडवरील दगडवाडीजवळ रस्त्यावर मोठे पाणी साचले. या पाण्याचा अंदाज न आल्याने अ‍ॅम्ब्युलन्स रस्त्याच्या खाली गेली. 50 फुट खाली गेल्यानंतर ती पलटी झाली. यात चालक चिलगर यांचा जागीच मृत्यू झाला. या घटनेची माहिती परळी ग्रामीण पोलीसांना मिळताच सहायक पोलीस निरीक्षक मारुती मुंढे यांनी सहकार्‍यांसह घटनास्थळी जावून मृतदेह शवविच्छेदनासाठी स्वाराती रुग्णालयात पाठविला.
