दिंद्रुड (रिपोर्टर) बीडच्या माजलगाव तालुक्यातील लोणगाव येथील डॉ. बाबासाहेब आंबेडकर नाम फलकाच्या विटंबना प्रकरणी दिंद्रुड पोलीस ठाण्यात लोणगाव येथील आंबेडकरी समाजाने बहुजन विकास मोर्चाचे नेते बाबुराव पोटभरे यांच्या नेतृत्वाखाली आंदोलन करत समाजकंटक आरोपीला तात्काळ अटक करण्याची मागणी केली. याप्रसंगी शेकडो महिलांसह लोणगाव ग्रामस्थांची उपस्थिती होती.
माजलगाव तालुक्यातील दिंद्रुड पोलीस हद्दीतील लोणगाव येथील डॉ.बाबासाहेब आंबेडकर चौकात असलेले डॉ. बाबासाहेब आंबेडकरांचे नामफलक दि. 17 ऑगस्ट रोजी काही अज्ञात समाजकंटकांनी रात्री 11 ते 12 च्या सुमारास जाळले होते. सदर प्रकरणात आठ दिवस गुन्हा दाखल होऊनही पोलिसांना त्या समाजकंटकाला शोधण्यात अपयश आल्यामुळे येथील आंबेडकरी समाज उग्र होत दिंद्रुड येथील पोलीस स्टेशनला ठिय्या आंदोलन करण्यासाठी बुधवारी सकाळी जमा झाला होता. याप्रसंगी बहुजन विकास मोर्चाचे नेते बाबुराव पोटभरे यांच्या उपस्थितीत दिंद्रुड पोलिसांना निवेदन देत येत्या तीन दिवसात सदर समाजकंटकाला अटक करण्याची मागणी आंबेडकरी समाजाने केली आहे. सदर आरोपीस अटक न झाल्यास येत्या सोमवारी माजलगाव तहसीलवर उग्र स्वरूपाचे आंदोलन करण्याचा इशारा यावेळी व्यक्त करण्यात आला आहे.
सदर प्रकरण घडून आठ दिवस उलटले आहेत मात्र दिंद्रुड पोलीस आरोपीला पकडण्यात अपयशी ठरले आहेत, यामुळे आम्ही हे आंदोलन छेडले असून येत्या तीन दिवसात आरोपीचा शोध घेत अटक नाही केल्यास माजलगावच्या तहसील कार्यालयाला आम्ही कुलूप ठोकणार आहोत, असे बाबुरावजी पोटभरे अध्यक्ष,बहुजन विकास मोर्चा यांनी म्हटले आहे.
घटना घडल्यापासून आम्ही लोनगावात तळ ठोकून आहोत. या प्रकरणात दोन आरोपी सीसीटीव्हीत अस्पष्ट दिसत असून आम्ही शोध घेत त्यांना जेरबंद करणार आहोत. आंबेडकरी समाज बांधवांनी शांत राहत सहकार्य करावे.
