बीड (रिपोर्टर) शहरातील तिरुपती नगर भागातील मोकळ्या पटांगणात एका 20 वर्षीय तरुणाचा रक्ताच्या थारोळ्यात मृतदेह आढळून आला. या मृतदेहापशी एक रिव्हॉल्व्हर सापडली. या तरुणाला मारण्यात आले की त्याने आत्महत्या केली हे तपासात समोर येईल. या घटनेने बीड शहरामध्ये एकच खळबळ उडाली. घटनास्थळी वरिष्ठ पोलीस अधिकारी दाखल झाले होते.
अक्षय कोंडीबा भांडवले (वय 20 वर्षे रा. तेलगाव नाका, बीड) याचा मृतदेह आज सकाळी तिरुपती नगर भागातील मोकळ्या पटांगणात आढळून आला. त्याच्या शरीरावर जखमा होत्या. विशेष म्हणजे त्याच्या जवळ रिव्हॉल्व्हर आढळून आली. या तरुणाला मारण्यात आले की त्याने आत्महत्या केली? हे पोलीस तपासामध्ये निष्पन्न होईल. घटनेची माहिती शिवाजीनगर पोलिसांना झाल्यानंतर वरिष्ठ पोलीस अधिकार्‍यांनी घटनास्थळी जावून पाहणी केली. मृतदेह शवविच्छेदनासाठी जिल्हा रुग्णालयामध्ये आणण्यात आला होता. या घटनेने बीड शहरामध्ये एकच खळबळ उडाली आहे. या प्रकरणाचा अधिक तपास पोलीस करत आहेत.
