मराठी गाणे लावण्यावरून वाद; पिस्तुलासह दोघे ताब्यात
गेवराई (रिपोर्टर): येथील डॉक्टर आपल्या मित्रांसमवेत संभाजीनगर येथील आकाशवाणी चौकात असलेल्या के.ए. लन्स या हॉटेलमध्ये जेवणासाठी गेले असता त्याठिकाणी डॉक्टरांनी मराठी गाण्याची फरमाईश केली, तेव्हा अन्य टेबलवरच्या दोघा अज्ञातांनी मराठी गाणे बंद करण्याचे सांगितले. यावरून दोघात वाद झाला असता अज्ञाताने अचानक डॉक्टरांच्या या मित्र कंपनीवर हल्ला करत डोक्याला पिस्तुल लावून जिवे मारण्याची धमकी दिली. डॉक्टरासह त्यांच्या मित्राच्या डोक्यात पिस्तुलच्या मुठीने वॉर करून जखमी केले. या प्रकरणी संभाजीनगर शहर पोलीस ठाण्यात दोघांविरोधात गुन्हे दाखल होत आरोपींना तात्काळ अटक करण्यात आली आहे.
याबाबत अधिक असे की, मूळचे आहेरधानोरा येथील रहिवासी आणि गेवराई येथे रुग्णसेवा देणारे डॉ. दीपक सुंदरराव फाटक हे परवा आपले मित्र एकनाथ पांडुरंग पवार, डॉ. अभिजीत विजय येवले (रा. बीड), मनोज सुदाम टाक (रा. गेवराई), जिवन नानासाहेब चव्हाण (रा. बीड) हे सर्व डॉक्टर मित्र जेवणासाठी परवा संभाजीनगरच्या आकाशवाणी चौकातील के.ए.लन्ज येथे जेवणासाठी गेले होते. या वेळी डॉक्टरांनी त्याठिकाणी मराठी गाणे लावण्याची फरमाईश केली. त्यावेळी अज्ञात दोघांनी संबंधित गाणे बंद करण्याचे सांगितले. यावरून वाद झाला. त्यावेळी त्यातील आरोपींनी आपल्या कमरेवर लावलेली पिस्तुल डॉक्टरांच्या डोक्यावर लावत ट्रिगरवर बोट ठेवून ‘देख लवायेंगे, मार लवायेंगे’ असं म्हणत जिवंत मारण्याचा प्रयत्न केला व पिस्तुलाची मुठ मारून गंभीर जखमी केले. त्यावेळी डॉक्टर मित्र एकनाथ पवार यांनी सदरील आरोपीचा हात पकडला असता त्यांच्यावरही हल्ला करण्यात आला. ही सर्व घटना सीसीटीव्हीत कैद झाली असून या प्रकरणी औरंगाबाद शहर पोलिसात डॉ. फाटक यांनी दिलेल्या तक्रारीवरून शस्त्र अधिनियम 1959 25, 3 कलम 307, 323, 324, 504, 506, 34 भा.दं.वि.नुसार गुन्हा दाखल करण्यात आला आहे. या घटनेची गंभीर दखल घेत शहर पोलिसांनी तत्काळ सीसीटीव्ही फुटेज ताब्यात घेऊन आरोपींची ओळख परेड केली तेव्हा एन.ए. सिडको भागात राहणारा मॅक्स हबीब अब्दुल शकुर आणि ज्योतीनगर भागात राहणारा जगजीतसिंह सुरींदरसिंह ओबेरॉय यांना ताब्यात घेतले आहे.
