गळा चिरुन मृतदेह
तहसिल परिसरात फेकला
परळीतील धक्कादाय घटनेने खळबळ : आरोपी अज्ञात, पोलिसांकडून तपास सुरु
परळी (रिपोर्टर):- गळ्यावर धारदार शस्त्राने वार करून एकाचा खून करण्यात आला. ही घटना परळी शहरात उघडकीस आली. खून झालेल्या व्यक्तीचा मृतदेह परळी तहसील कार्याल्यासमोरील मैदानात फेकण्यात आला. आज रविवार (दि. 22) रोजी सकाळी ही घटना उघडकीस आली. शहरपोलिसांनी घटनास्थळी तातडीने धाव घेतली.
महादेव दत्तात्रय मुंडे (रा. भोपळा, तालुका परळी वय 40) असे खून झालेल्या व्यक्तीचे नाव आहे. खुनाच्या या घटनेने शहर हादरले. महादेव मुंडे हे भोपळा गावातील मूळ रहिवाशी असून परळीच्या आंबेजोगाई रोडवरील एका नगरमध्ये रहावयास होते. रविवारी सकाळी महादेव मुंडे यांचा मृतदेह येथील तहसिल कार्यालयसमोरील जागेत आढलून आला. शवविच्छेदनासाठी मृतदेह परळीच्या उपजिल्हा रुग्णालयात आणण्यात आला. परळी शहर पोलिसांना ही घटना समजताच तातडीने शहरचे ठाणे प्रमुख पोलीस निरीक्षक रवी सानप, पोलीस जमादार भास्कर केंद्रे, गोविंद भताने, राम रेडेवार, दत्ता गित्ते, विष्णू फड, किशोर घटमल, व इतर कर्मचार्‍यांनी भेट देऊन पाहणी केली. याबात वरिष्ठ पोलीस अधिकार्‍यांना घटनेची माहिती मिळताच अंबाजोगाईच्या अतिरिक्त जिल्हा पोलीस अधीक्षक कविता नेरकर व अंबाजोगाईचे उपविभागीय पोलिस अधिकारी अनिल चोरमले यांनी घटनास्थळी भेट देवून पाहणी केली.
आर्थिक व्यवहारातून खून?
हा खुनाचा प्रकार आहे. गळ्यावर व गालावर शस्त्राने वार केल्याने जखमचे व्रण होते. आर्थिक व्यवहारातून हा प्रकार झाल्याचा प्राथमिक अंदाज आहे. पोलीस तपासात कारण पुढे येईल, असे परळी शहर पोलिस ठाण्याचे पोलीस निरीक्षक रवी सानप यांनी म्हटले.
