बीडमधील नाट्य संमेलनाची उत्साहात सुरुवात
बीड (रिपोर्टर): शहरात नगराध्यक्ष असताना आपण 89 वे अखिल भारतीय मराठी नाट्य संमेलन आयोजित केले होते. 100 व्या अखिल भारतीय मराठी नाट्य संमेलनाचे विभागीय नाट्य संमेलन हे बीड शहरात होत आहे, याचा खूप मनस्वी आनंद होत आहे. बीडचे विभागीय नाट्य संमेलन ऐतिहासिक ठरेल, असा विश्वास बीडचे माजी नगराध्यक्ष डॉ.भारतभूषण क्षीरसागर यांनी व्यक्त केला.
अखिल भारतीय मराठी नाट्य परिषदेच्या 100 व्या विभागीय नाट्य संमेलनाला (दि.1) सकाळी 11 वाजता शहरातील यशवंतराव चव्हाण नाट्यगृहातील स्व.मधुकरराव गोडसे रंगमंचावर प्रारंभ झाला. या ऐतिहासिक विभागीय नाट्यसंमेलनाचे उद्घाटक म्हणून डॉ.भारतभूषण क्षीरसागर हे बोलत होते.
कार्यक्रमाची सुरुवात मान्यवरांच्या हस्ते नटराजांच्या मूर्तीची पूजा आणि दीप प्रज्वलन करून करण्यात आली. मान्यवरांच्या हस्ते नटराजाच्या मूर्तीची पूजा व दीपप्रज्वलन करून संमेलनाची सुरुवात करण्यात आली. व्यासपीठावर किशोर काळे, सुभाष सपकाळ, भीमराव वाघचौरे, गणेश वाघमारे, ड.गर्जे, शेख पाशा, ड.विकास जोगदंड, डॉ.विद्यासागर पाटांगणकर, भरतआण्णा लोळगे, डी.एस.कुलकर्णी, डॉ.संजय पाटील देवळाणकर, प्राचार्य डॉ.शिवानंद क्षीरसागर आदींची उपस्थिती होती.
पुढे बोलताना डॉ.भारतभूषण क्षीरसागर म्हणाले की, नाट्य संमेलनात विविध सांस्कृतिक कार्यक्रम पहावयास मिळणार आहेत. सिनेकलावंत यांच्यासह जिल्हाभरातील कलावंत या संमेलनात आपली कला सादर करणार आहेत. त्यांच्या केलेला बीडकरांनी कार्यक्रमाला उपस्थित राहून दाद द्यावी. बीडमध्ये एकमेव नाट्यगृह हे कलावंताच्या कला सादर करण्यासाठी आणि हक्काचे व्यासपीठ मिळावे हा एकमेव उद्देश डोळ्यासमोर ठेऊन उभा केले. विभागीय नाट्य संमेनाचे बीडमध्ये आयोजन करून अतिशय छान नियोजन केल्याबद्दल डॉ.भारतभूषण क्षीरसागर यांनी अखिल भारतीय मराठी नाट्य परिषद बीड शाखाध्यक्ष डॉ.दीपाताई क्षीरसागर यांचे अभिनंदन केले आणि सर्व कलावंतांना शुभेच्छा दिल्या. यावेळी गेवराई तालुक्यातील कलावंतांनी शाहीर विलास सोनवणे प्रस्तुत नागलोक टिपरे नृत्य सादर करून प्रेक्षकांचे मनोरंजन केले.