पाण्यासाठी दिंद्रुडमध्ये महिलांनी रस्ता अडवला
कडा/केज/दिंद्रुड (रिपोर्टर): मराठवाड्यामध्ये यावर्षी दुष्काळ असल्याने अनेक गावात पिण्याच्या पाण्याची टंचाई जाणवू लागली. टँकरची मागणी करूनही त्याला मंजुरी मिळत नसल्याने सरपंचासह महिलांनी रस्त्यावर उतरून रस्ता रोको आंदोलन केले तर कडा, साबलखेड-चिंचपूर या रस्त्याचे काम संथगतीने सुरू असून काम त्वरीत करण्यात यावे यासाठी कड्यात रास्ता रोको आंदोलन करण्यात आले. केज येथेही महार्गाच्या कामासंदर्भात केजडी नदीवर आंदोलन झाले. या आंदोलनामुळे महामार्गावरील वाहतूक काही वेळ ठप्प झाली होती. नगर-आष्टी 561 हा महामार्ग आष्टी ते साबलखेड या दरम्यान होत आहे.
रस्त्याचे काम संथगतीने होत असल्याने त्याचा परिणाम बाजारपेठेवर होऊ लागला आहे. नागरीकांना अनेक अडचणींना तोंड द्यावे लागत असल्याने सदरील रस्त्याचे काम तात्काळ करण्यात यावे यासाठी कडा येथील डॉ. बाबासाहेब आंबेडकर चौकात रास्ता रोको आंदोलन करण्यात आले. या वेळी अभियंता भोपळे, तलाठी जगन्नाथ राऊत यांना आंदोलनकर्त्यांनी आपल्या मागण्यांचे निवेदन दिले. या आंदोलनात रमजान तांबोळी, संपत सांगळे, अनिल ढोबळे, हेमंत मेहेरे, योगेश भंडारी यांच्यासह आदींचा सहभाग होता. दुसरे आंदोलन दिंद्रुड येथे झाले. ग्रामपंचायतीला पाच टँकरची मंजुरी देण्यात यावी, या मागणीसाठी सरपंच अजय कोमटवार यांनी रस्त्यावर उतरून महामार्गावर आंदोलन केले. या आंदोलनात महिलांची संख्या मोठ्या प्रमाणात होती. हंडा घेऊन महिला पाण्यासाठी रस्त्यावर उतरले होते. तिसरे आंदोलन केज येथे झाले. केज येथून जाणार्या महामार्गाचे काम संथगतीने होत असल्याने सदरील काम तात्काळ करण्यात यावे, यासाठी केजडी नदीवर रास्ता रोको आंदोलन करण्यात आले. हे आंदोलन हनुमंत भोसले यांच्या नेतृत्वाखाली झाले. या वेळी शाकेर मुंडेंसह आदींची मोठ्या संख्येने उपस्थिती होती.