बीड (रिपोर्टर): राज्याच्या राजकारणाला दिशा दाखवणार्या आणि सातत्याने बहुचर्चीत असलेल्या बीड लोकसभा मतदारसंघाची तटबंदी भाजपा उमेदवार पंकजा मुंडेंनी गेल्या 20 दिवसात मजबूत केल्याचे दिसून येत आहे. 20 दिवसांच्या कालखंडात पंकजा मुंडेंनी जाहीर प्रचार सभांपेक्षा प्रत्यक्ष गाठीभेटीवर अधिक भर दिल्याने मतदारसंघातल्या बीड, गेवराई, आष्टी, माजलगाव, परळी, केज विधानसभा मतदारसंघात आपल्या पक्षाच्या मताची गोळाबेरीज केल्याने पंकजा आजस्थितीला सुरक्षित नव्हे तर लिडच्या बेरजेत जिल्हाभरात चर्चेत असल्याचे पहावयास मिळत आहे.
राज्यातल्या काही महत्वाच्या आणि चर्चेत असलेल्या मतदारसंघापैकी बीड लोकसभा मतदारसंघ हा अधिक चर्चेत आहे. भाजपाने विद्यमान खासदार प्रितम मुंडेंऐवजी भाजपाच्या राष्ट्रीय सचिव पंकजा मुंडेंना उमेदवारी दिली. पाठोपाठ राज्याच्या राजकारणाचे राजकीय समीकरणे बदलल्यामुळे बीड जिल्ह्यात अजित पवारांची राष्ट्रवादी पंकजांसोबत राहिली. आजपर्यंत कट्टर विरोधक असलेले राज्याचे कृषीमंत्री धनंजय मुंडे हे या निवडणुकीत पंकजा मुंडेंच्या पाठीशी खंबीरपणे उभे असल्याने या निवडणुकीत पंकजा मुंडेंची लिड किती असेल यावर अधिक चर्चा होताना दिसते. दुसरीकडे कुठलीही निवडणूक सोपी नसते, असे म्हणत पंकजांनी उमेदवारी घोषीत झाल्यापासून बीड जिल्ह्यात डेरेदाखल होणे पसंत करत आतापर्यंत दोन वेळेस जिल्ह्याचा दौरा करून जाहीर सभांपेक्षा मतदारसंघातल्या नागरिकांच्या प्रत्यक्ष भेटी घेतल्या. सण, उत्सव पंकजा यांनी ऊसतोड कामगारांच्या सोबत साजरे केले. एकीकडे पंकजा मुंडे जात-पात-धर्मापेक्षा विकासाला अधिक महत्व देत बीड जिल्ह्याचा विकास हेच आपले ध्येय असल्याचे त्या स्पष्ट करतात. आरक्षणाच्या मुद्यावरून सुरू असलेल्या आंदोलनाचा प्रभाव बीड जिल्ह्यावर अधिक आहे. त्या प्रभावीत क्षेत्रात पंकजा मुंडे येथील लोकांना आश्वासित करत असल्याचेही दिसून येते. दुसरीकडे पंकजा मुंडेंच्या पाठिशी शिलेदारांची फौज असल्याने बीड मतदारसंघाची तटबंदी अधिक अधिक मजबूत असल्याचे पहावयास मिळते. जिल्ह्यातल्या 11 तालुक्यात ही तटबंदी भाजपाच्या आणि राष्ट्रवादीच्या शिलेदारांनी अधिक मजबूत केल्याचेही पहावयास मिळते. इकडे गेवराईमध्ये भाजपाचे विद्यमान आमदार लक्ष्मण पवार त्याचबरोबर राष्ट्रवादीचे अमरसिंह पंडित तर बीडमध्ये शिंदे सेनेचे अनिल जगताप, कुंडलिक खांडे, सचीन मुळुक, भाजपाचे राजेंद्र मस्के, योगेश क्षीरसागर, अमर नाईकवाडे, फारुक पटेल, आष्टी-पाटोद्यात आ. सुरेश धस, आ. बाळासाहेब आजबे, माजी आ. भीमराव धोंडे यांच्यासह स्थानीकचे लोकप्रतिनिधी, इकडे माजलगावमध्ये आ. प्रकाश सोळंके, रमेश आडसकर, मोहन जगताप यांच्यासह अन्य नेते ताकतीने काम करताना दिसून येत आहेत. तिकडे परळी, अंबाजोगाईमध्ये स्वत: पालकमंत्री धनंजय मुंडेंनी आपली ताकत पणाला लावली आहे. एकूणच आज मितीला भाजपा उमेदवार पंकजा मुंडे या अधिक अधिक प्रभावी दिसून येत आहेत.