रिपाईचे तालुकाध्यक्ष किशोर कांडेकर यांचा गेवराईमध्ये झंझावात
गेवराई, दि.07 (प्रतिनिधी) ः- सरकारी नोकरीतून भ्रष्ट मार्गाने कमविलेल्या पैशांतून दलित, वंचित मतदारांना प्रलोभने देण्याचा प्रयत्न होत आहे, स्वाभिमानी मतदार कोणाच्याही अमिषाला बळी पडणार नाही. या निवडणुकीत दलित, वंचित, ओबीसी आदी मतदार ना.रामदास आठवले यांच्या नेतृत्वाखाली महायुतीच्या पाठिशी खंबीरपणे उभा आहे. गोर-गरीबांच्या सुख-दुःखात साथ देणार्या विजयसिंह पंडित यांना विधानसभेत पाठविण्याचा निर्धार मतदारांनी केला आहे. दलित, वंचित मतदार विजयसिंह पंडित यांच्या विजयाचा शिल्पकार होईल असे प्रतिपादन रिपाईचे गेवराई तालुकाध्यक्ष किशोर कांडेकर यांनी केले. त्यांनी रेवकी, संगमजळगाव, गुंतेगाव, बोरगाव, पाथरवाला आदी भागांत झंझावाती दौरे करून प्रचाराला शुभारंभ केला आहे.
गेवराई विधानसभा मतदार संघातील महायुतीचे उमेदवार विजयसिंह पंडित यांच्या प्रचारार्थ मित्रपक्षाचे पदाधिकारी जोमाने कामाला लागले आहेत, गेवराई तालुका रिपाई (आठवले गट) चे तालुकाध्यक्ष किशोर कांडेकर यांच्या झंझावाती दौर्यामुळे मतदार संघात विजयसिंह पंडित यांचे वारे वाहू लागले आहे. त्यांनी रेवकी, संगमजळगाव, गुंतेगाव, बोरगाव, पाथरवाला आदी भागांत झंझावाती दौरे करून प्रचाराला शुभारंभ केला. यावेळी बोलताना त्यांनी विरोधकांवर टिका केली. ते म्हणाले की, शासकीय नोकरीतून भ्रष्ट मार्गाने कमविलेले करोडो रुपये काही लोक निवडणुकीत मतदारांना अमिष दाखविण्यासाठी बाहेर काढत आहेत तर काही उमेदवार बौध्द समाजाच्या स्मशानभुमीची जागा हडप करण्याचा प्रयत्न करत आहेत. आम्ही पैशाने गरीब असलो तरी स्वाभिमानी आहोत अशा आमिषाला दलित समाज भुलणार नाही.
यावेळी त्यांच्यासमवेत सोशल मिडीयाचे दिपक निकाळजे, युवा रिपाईचे सोनम कांडेकर यांच्यासह विनोद गायकवाड, विजय हराळे, सुनिल घसिंग, अनिल घसिंग, गौतम सदाफुले, मार्तंड सदाफुले, भगवान सदाफुले, राजीव सदाफुले यांच्यासह रिपाईचे पदाधिकारी, कार्यकर्ते मोठ्या संख्येने उपस्थित होते.
