बीड : ऑनलाईन रिपोर्टर
डायल-११२ वर फोन करून चोरी झाल्याची खोटी माहिती देत पोलीस यंत्रणेला विनाकारण त्रास देणाऱ्या गेवराई तालुक्यातील इसमावर कडक कारवाई करण्यात आली असून त्याची जिल्हा कारागृह बीड येथे रवानगी करण्यात आली आहे.
प्रदोष गंगाधर जाधव (रा. कुंभारवाडी, ता. गेवराई, जि. बीड) याने ३० जानेवारी रोजी रात्री १०.२० वाजता डायल-११२ वर कॉल करून मादळमोही येथील बालाजी ट्रेडिंग कंपनीत सोने व रोकड चोरी झाल्याची खोटी माहिती दिली. माहिती मिळताच पोलीस चौकी मादळमोही येथील कर्मचाऱ्यांनी संपर्क साधला असता सदर इसमाने “पोलीसांना काम लावण्यासाठी मुद्दाम फोन केला,” असे कबूल केले.
तपासाअंती घटना खोटी असल्याचे स्पष्ट झाल्याने पोलीस ठाणे गेवराई येथे कलम २१२ (भारतीय न्याय संहिता-२०२३) अंतर्गत गुन्हा दाखल करण्यात आला. पुढे संबंधिताने पोलिसांना धमकी दिल्याने त्याच्यावर कलम २२४ बी.एन.एस. प्रमाणे अदखलपात्र गुन्हाही नोंदवण्यात आला.
त्यानंतर प्रतिबंधक कारवाई करत आरोपीस विशेष कार्यकारी दंडाधिकारी तथा अपर पोलीस अधीक्षक बीड यांच्यासमोर हजर करण्यात आले. दिनांक ९ फेब्रुवारी रोजी पावेता एम.सी.आर. मंजूर झाल्यानंतर त्याची जिल्हा कारागृह बीड येथे रवानगी करण्यात आली.
ही कारवाई पोलीस अधीक्षक नवनीत काँवत, अपर पोलीस अधीक्षक सचिन पांडकर, उपविभागीय पोलीस अधिकारी अनिल कटके यांच्या मार्गदर्शनाखाली पोलीस निरीक्षक किशोर पवार, ग्रे. पोउपनि. राजाभाऊ गर्जे, पोह संजय गुजर, विजय परजणे व पोलीस चौकी मादळमोहीच्या कर्मचाऱ्यांनी केली.
दरम्यान, बीड जिल्हा पोलीस व गेवराई पोलीस प्रशासनाने नागरिकांना आवाहन केले आहे की, डायल-११२ वर खोटी माहिती देऊ नये. अशा प्रकारामुळे गरजू लोकांपर्यंत मदत पोहोचण्यास विलंब होऊ शकतो, तसेच खोटी माहिती देणाऱ्यावर कठोर कायदेशीर कारवाई करण्यात येईल.
