; रोहित पवार यांच्या पाठपुराव्याला यश
पुणे : राष्ट्रवादी काँग्रेसचे आमदार रोहित पवार यांच्या सातत्यपूर्ण पाठपुराव्यानंतर बारामतीजवळ घडलेल्या लियरजेट-४५ विमान दुर्घटना प्रकरणी अखेर पोलिस ठाण्यात गुन्हा दाखल करण्यात आला आहे. कर्नाटकातील बंगळुरू येथील शेशाद्रीपुरम पोलीस ठाण्यात ‘झिरो FIR’ स्वरूपात हा गुन्हा नोंदवण्यात आला असून, दुर्घटनेमागे मोठा गुन्हेगारी कट असण्याची शक्यता तक्रारीत व्यक्त करण्यात आली आहे.
विशेष म्हणजे, आजच रोहित पवार यांनी विधानसभेत हा मुद्दा उपस्थित करत प्रशासनाच्या भूमिकेवर प्रश्नचिन्ह उपस्थित केले होते. किरकोळ चोरीच्या घटनांमध्येही गुन्हे दाखल होतात, मात्र इतक्या मोठ्या दुर्घटनेत गुन्हा नोंदवला गेला नाही, अशी टीका त्यांनी केली होती.
28 जानेवारीची भीषण दुर्घटना
मुंबईहून बारामतीकडे येणारे VT-SSK नोंदणीचे बॉम्बार्डियर लियरजेट-45 विमान 28 जानेवारी 2026 रोजी सकाळी सुमारे 8.43 ते 8.45 वाजण्याच्या दरम्यान बारामती विमानतळाजवळ कोसळले होते. VSR व्हेंचर्स प्रायव्हेट लिमिटेड कंपनीमार्फत चालवले जाणाऱ्या या विमान दुर्घटनेत विमानातील सर्व पाच जणांचा मृत्यू झाला होता. मृतांमध्ये तत्कालीन उपमुख्यमंत्री अजित पवार यांचाही समावेश होता.
या प्रकरणी रोहित पवार यांनी भारतीय नागरिक सुरक्षा संहिता 2023 च्या कलम 173(1) अंतर्गत तक्रार दाखल केली. यापूर्वी त्यांनी 25 फेब्रुवारी रोजी मुंबईतील मरीन ड्राईव्ह पोलीस ठाणे तसेच 26 फेब्रुवारी रोजी बारामती पोलीस ठाण्यात संपर्क साधला होता; मात्र त्यावेळी FIR नोंदवण्यात आला नव्हता. पुणे सीआयडीकडून केवळ अपघाती मृत्यू अहवालाच्या अनुषंगाने तपास सुरू असल्याचे सांगण्यात आले होते.
गुन्हेगारी कटाचा संशय
रोहित पवार यांच्या तक्रारीनुसार ही घटना केवळ अपघात नसून नियोजित गुन्हेगारी कटाचा भाग असू शकते. विमान सुरक्षेच्या नियमांचे उल्लंघन, बनावट नोंदी तयार करणे, देखभाल प्रक्रियेत निष्काळजीपणा आणि ऑपरेशनमधील गंभीर त्रुटी यांचा तक्रारीत उल्लेख करण्यात आला आहे.
24 फेब्रुवारी रोजी नागरी विमान वाहतूक महासंचालनालयाने (DGCA) सादर केलेल्या सुरक्षा लेखापरीक्षण अहवालात VSR कंपनीची काही विमाने उड्डाणासाठी अयोग्य असल्याचे नमूद करण्यात आले होते. संबंधित VT-SSK विमानाने सुमारे 4,915 उड्डाण तास पूर्ण केले होते, जे 5,000 तासांच्या अनिवार्य इंजिन ‘टाइम बिफोर ओव्हरहॉल’ (TBO) मर्यादेच्या अत्यंत जवळ होते. तरीही विमान व्यावसायिक वापरात ठेवण्यात आल्याचा आरोप करण्यात आला आहे.
उड्डाण तासांबाबत गंभीर प्रश्न
तपासादरम्यान विमानाचे प्रत्यक्ष उड्डाण तास अधिक असून अधिकृत नोंदींमध्ये कमी दाखवण्यात आल्याची शक्यताही व्यक्त करण्यात आली आहे. काही माहितीनुसार विमानाने 8,000 तासांपेक्षा अधिक उड्डाण केले असण्याचा संशय असून, हे प्रमाण सुरक्षित मर्यादेपेक्षा जास्त असल्याचे तक्रारीत नमूद करण्यात आले आहे.
या प्रकरणात एअरक्राफ्ट अॅक्सिडेंट इन्व्हेस्टिगेशन ब्युरो (AAIB) कडून तांत्रिक चौकशी सुरू असताना स्वतंत्र गुन्हेगारी तपासही करण्यात यावा, अशी मागणी करण्यात आली आहे.
