बीड (रिपोर्टर) जिल्हा शल्यचिकित्सक म्हणून डेपोटेशनवर आलेले डॉ. सुरेश साबळे हे कर्तव्यकठोर आणि रुग्णसेवेत तत्पर असल्या कारणाने त्यांची नियुक्ती बीड जिल्हा रुग्णालयात कायमस्वरुपी करण्यात यावी, अशा आशयाची मागणी मुख्यमंत्री एकनाथ शिंदे यांच्याकडे लावून धरली होती. डॉ. सुरेश साबळे हे रुग्णालयासाठी आणि रुग्णांसाठी किती महत्वाचे आहेत हे त्यांना सांगितले. तेव्हा अखेर डॉ. साबळे यांचे जिल्हा शल्यचिकित्सक म्हणून बीड जिल्हा रुग्णालयात कायमस्वरुपी आदेश मुख्यमंत्री एकनाथ शिंदे यांनी काढले. मुख्यमंत्र्यांचे याबाबत जाहीर आभार बाळासाहेबांची शिवसेनाचे जिल्हाप्रमुख सचीन मुळुक यांनी मानले. त्यानंतर आज डॉ. सुरेश साबळे यांनी सचीन मुळुक यांचा हृदयसत्कार केला.
गेल्या वर्षभरापूर्वी बीड जिल्हा रुग्णालयाचा तात्पुरता कार्यभार डॉ. सुरेश साबळे यांच्याकडे देण्यात आला होता. वर्षभराच्या कालखंडामध्ये डॉ. सुरेश साबळे यांनी कर्तव्य कठोरता आणि रुग्णसेवा देत आपल्या कामाची चुणूक बीड जिल्ह्याला दाखवून दिली. दवाखान्यातील स्वच्छतेपासून औषधोपचार, ऑपरेशन यासह अन्य सुविधा गोरगरिब
रुग्णांना डॉ. साबळे यांच्यामुळे मिळत गेल्या. मात्र गेल्या महिना-दोन महिन्यांपूर्वी साबळे यांची अचानक बदली झाली. या वेळी त्यांची बदली रद्द करण्यात यावी यासाठी काहींनी आंदोलनेही केले. सदरची बाब आम्ही मुख्यमंत्री एकनाथ शिंदे यांच्या निदर्शनास आणून देत संबंधित डॉक्टर हे कर्तव्यकठोर आणि रुग्णसेवेत तत्पर आहेत, त्यामुळे त्यांच्याकडे जिल्हा रुग्णालयाचा जिल्हा शल्यचिकित्सक म्हणून कायमस्वरुपी पदभार द्यावा, अशी विनंती मुख्यमंत्र्यांकडे आम्ही केली. मुख्यमंत्र्यांनी आमच्या विनंतीला मान देत अखेर साबळे यांची जिल्हा रुग्णालयात कायमस्वरुपी नियुक्ती केली. मुख्यमंत्र्यांचे जाहीर आभार, असे बाळासाहेबांची शिवसेनाचे जिल्हाप्रमुख सचीन मुळुक यांनी प्रसिद्धीस दिलेल्या पत्रकात दिले. पुढे त्यांनी मुख्यमंत्री एकनाथ शिंदेंच्या मार्गदर्शनाखाली बीड जिल्ह्यात सर्वस्तरावर चांगल्यात चांगले काम केले जाईल, असेही मुळुक यांनी यात म्हटले.
डॉ. साबळेंकडून मुळुक यांचा सत्कार
जिल्हा शल्यचिकित्सक डॉ. सुरेश साबळे यांची जिल्हा रुग्णालयात कायमस्वरुपी नियुक्ती झाल्यानंतर आज डॉ. साबळे यांनी सचीन मुळुक यांचा हृदयसत्कार केला.