तराफे जाळली; थर्माकोलवरून शाळेत जाताना मुलं पाण्यात पडली; जीव गेल्यावर प्रशासन जागं होणार का?-डॉ.गणेश ढवळे
बीड (रिपोर्टर) रस्त्यासाठी मतदानावर बहिष्कार टाकण्याचा ईशारा देणा-या शिंदेवस्तिवरील ग्रामस्थांचे तराफे दि.11 रोजी रविवारी रात्री अज्ञात व्यक्तिनी जाळुन टाकले संबधित प्रकरणात पाटोदा पोलीस स्टेशन मध्ये एनसीआर 0419/2022 दाखल करण्यात आला असून शालेय विद्यार्थांवर पुन्हा थर्माकोलवरून जीवघेणा प्रवास करण्याची वेळ आली असून दि.12 सोमवार रोजी थर्माकोलवरून प्रवास करताना शाळकरी मुलं पाण्यात पडली सुदैवाने वाचली परंतु जिल्हाप्रशासनाला याचे सोयरे सुतक नसुन मुलांचा जीव गेल्यावरच प्रशासन जागे होणार का असा संतप्त सवाल ग्रामस्थांनी विचारला आहे.
रविवारी तराफा जाळल्यानंतर सोमवारी मुलगा व मुलगी थर्माकोलवरून शाळेत जात असताना तोल जाऊन पाण्यात पडली. त्यांच्या वडीलांनी जीव वाचवला पण तेव्हापासून मुलं घाबरलेली असून शाळेत जायचं नगं म्हणतेत. तराफे जाळल्याचे कळाल्यानंतर आ.सुरेश आण्णा धस यांनी ग्रामस्थांशी संपर्क साधून विचारपूस करत ग्रामस्थांना तराफे देण्याचे आश्वासन दिले. तराफे काल रात्री आले होते परंतु फुटलेले खराब निघाल्यामुळे परत पाठवले असून 3-4 दिवसात बसवण्यात येतील असे सांगण्यात आले.
बीड येथे कर्तव्य बजावलेले संवेदनशील अप्पर पोलीस अधीक्षक ग्रामीण औरंगाबाद यांनी फेसबुकवर पोष्ट पाहून डॉ.गणेश ढवळे यांच्याशी संपर्क साधत तराफ्यासाठी मदतनिधी गोळा करण्याची तयारी दर्शवली परंतु आ.सुरेश आण्णा धस देणार आहेत असं त्यांना कळवण्यात आले. ईतर कोणतीही मदत लागली तर कधीही संपर्क साधा म्हणाले. एकंदरीतच बीड सोडून गेले तरी बीड जिल्ह्यातील लोकांबद्दल आपुलकी त्यांच्या संवेदनशील मनाची साक्ष देते. वारंवार निवेदन तसेच आंदोलनानंतर पाटोदा तहसिल प्रशासन सहकार्य करत नसल्यामुळेच संतप्त ग्रामस्थांनी दि.19 सोमवार रोजी डॉ.गणेश ढवळे लिंबागणेशकर यांच्या नेतृत्वाखाली जिल्हाधिकारी कार्यालयासमोर आंदोलनाचा ईशारा दिला असून निवेदनावर परमेश्वर शिंदे,ज्ञानेश्वर शिंदे,बाबासाहेब शिंदे,बाबु शिंदे,युवराज शिंदे,बिभिषण शिंदे,बापु शिंदे,संकेत शिंदे आदिंच्या स्वाक्ष-या आहेत.