शिक्षकांचे पैसे खाणारा मुख्याध्यापक चारशोबीस
अंजनडोह जि.प.चे मुख्याध्यापक नखातेवर गुन्हा दाखल
बीड, (रिपोर्टर):- धारूर तालुक्यातील अंजनडोह जिल्हा परिषद प्राथमिक शाळेतील मुख्याध्यापक रमेश नखाते यांनी केंद्रांअंतर्गत कार्यरत असलेल्या शिक्षकांची जीपीएफ आणि एलआयसीचे पैसे त्यांच्या खात्यावर न भरता परस्पर उचलल्याने मुख्य कार्यकारी अधिकारी नखाते यांना निलंबीत केले होते. निलंबन कालावधीमध्ये अपहाराचे 26 लाख रूपये तात्काळ भरावे असे आदेश भरूनही नखाते यांनी 26 लाखांच्या ऐवजी फक्त 6 लाखच भरल्याने काल धारूरचे गटशिक्षण अधिकारी गिरी यांनी नखाते यांच्यावर गुन्हा दाखल केलेला आहे.
अंजनडोह जि.प. केंद्राअंतर्गत 1 जानेवारी 2019 ते 31 जानेवारी 2022 पर्यंत या कालावधीत या केंद्राअंतर्गत कार्यरत असलेल्या शिक्षकांचे एलआयसीची रक्कम, जीपीएफचा हप्ता त्यांच्या खात्यावर वर्ग न करता स्वत:च आपल्याकडे वळवला आणि त्या रकमेचा अपहार केला. याबाबत मुख्य कार्यकारी अधिकारी यांच्याकडे तक्रारी प्राप्त झाल्यानंतर मुख्य कार्यकारी अधिकार्यांनी नखाते यांची चौकशी करण्यासाठी समिती नियुक्त केली होती. या समितीने मुख्याध्यापक नखाते यांनी 26 लाख 47 हजार 61 रूपयांचा अपहार केल्याचे अहवाल मुख्य कार्यकारी अधिकारी यांना सोपविला होता त्यानुसार मुख्याध्यापक नखाते यांच्यावर निलंबनाची कार्यवाही करण्यात आली होती. निंलबन कालावधीमध्ये त्यांनी 26 लाख 47 हजार रूपये तात्काळ भरावे असेही आदेश दिले होते, मात्र 26 लाखांऐवजी निलंबीत मुख्याध्यापक नखाते यांनी 5 लाख 80 हजार ईतकीच रक्कम भरणा केली. पुर्ण रकमेच्या भरणा करण्याबाबत गटशिक्षणअधिकारी यांनी तोंडी आणि लेखी सुचना देवुनही ही रक्कम न भरल्याने काल धारूर पोलीस ठाण्यामध्ये गटशिक्षण अधिकारी गिरी यांनी निलंबीत मुख्याध्यापक नखाते यांच्या विरोधात फिर्याद दिली.त्यानुसार भादवी 420, 409, 408 अन्वये गुन्हा दाखल करण्यात आला आहे.पुढील तपास धारूर पोलीस करत आहेत.