जरांगेंच्या स्वागतासाठी हजारोंचा जनसमुदाय, ‘एक मराठा लाख मराठा’ घोषणेने बीड दणाणले, रामगडासह तादंळ्याच्या सप्ताहाला जरांगेंची भेट, पेंडगावमध्ये शंभर जेसीबीतून जरांगेंवर फुलांची उधळण, आत्महत्या केलेल्याची कुुटुंबियांची भेट घेत जरांगे पाटलांकडून स्वागत
बीड (रिपोर्टर): दगडफेक, जाळपोळीच्या घटनेमध्ये जे खरे गुन्हेगार आहेत त्यांना नक्कीच अटक करा, मात्र त्यांच्या आडून ज्या पद्धतीने निष्पाप, निर्दोष आणि केवळ त्या जमावात उपस्थित आहेत म्हणून काही मुलांना अटक केली जात आहे. ते संतापजनक आहे. अशा निष्पाप पोरांवर कारवाई करू नका, त्यांना मारहाण करू नका, तशा सूचना संबंधित अधिकार्यांना तात्काळ द्या, असे म्हणत मनोज जरांगे पाटील यांनी आज जिल्हा पोलीस अधिक्षक नंदकुमार ठाकूर यांची भेट घेतली. तत्पूर्वी जरांगे पाटील यांनी तांदळवाडी, रामगड या ठिकाणी भेट दिली. पेंडगावमध्ये शंभर जेसीबीमधून जरांगे पाटील यांच्यावर फुलांची उधळण करण्यात आली. या वेळी मराठा समाजाचे हजारो लोक त्यांच्या सोबत उपस्थित होते.
‘ मनोज जरांगे तुम आगे बढो…हम तुम्हारे साथ है’, ‘एक मराठा लाख मराठा’ ‘आरक्षण आमच्या हक्काचं नाही कोणाच्या बापाचं’ यासह अन्य घोषणांनी आज बीड शहर दणाणून गेले होते. निमित्त होते, मराठा आरक्षणाबाबत आंदोलन उभे करणारे आणि अखंड मराठ्यांना एकजूट करत हक्काच्या आरक्षणाची मुहूर्तमेढ रोवणारे मनोज जरांगे पाटील यांचा बीड दौरा. आज सकाळी ते बीड जिल्ह्यात डेरेदाखल झाले. शहागडपासून त्यांचे प्रत्येक फाट्यावर जल्लोषात स्वागत करण्यात येत होते. तांदळवाडी येथे एका सप्ताहास भेट दिल्यानंतर जरांगे पाटील यांनी रामगडाला भेट दिली. पुढे ते कार्यक्रमासाठी पेंडगावमध्ये डेरेदाखल झाले. या वेळी त्यांचे शंभर जेसीबींमधून फुलांचा वर्षाव करत स्वागत करण्यात आले. शहरात डेरेदाखल झाल्यानंतर जरांगे पाटील यांनी छत्रपती शिवाजी महाराजांच्या पुतळ्यास पुष्पहार अर्पण करत अभिवादन केले. पुढे त्यांनी जिल्हा पोलीस अधिक्षक नंदकुमार ठाकूर यांची त्यांच्या कार्यालयात जावून भेट घेतली. या वेळी निष्पापांना त्रास देऊ नका, जमावामध्ये उभे असलेल्या मुलांना पकडून तुमची पोलीस जाणीवपुर्वक त्यांना मारहाण करत आहे, 307 सारखे गंभीर गुन्हे दाखल करत आहे. हे अत्यंत संतापजनक आणि चुकीचे आहे, जे दोषी असतील, ज्यांच्या हातात दगडे असतील त्यांच्यावर नक्कीच कारवाई करा, मात्र निष्पाप पोरांना त्रास देऊ नका, असं म्हणत जरांगे पाटील यांनी बीडमध्ये झालेल्या दगडफेक, जाळपोळीबाबत माहिती घेत जिल्हा पोलीस अधिक्षकांना त्यांच्याकडे असलेली उपलब्ध माहिती दिली. त्याचबरोबर निष्पाप पोरांना त्रास न देण्याचेही म्हटले. पुढे जरांगे पाटील हे आत्महत्या केलेल्या कुटुंबियांची भेट घेण्यासाठी गेले. बीडमध्ये एक ठिकाणी भेट दिल्यानंतर ते पुढे पाली, कोळवाडी या ठिकाणी गेले. या वेळी जरांगे यांच्या सोबत हजारोंच्या संख्येने मराठा समाज बांधव उपस्थित होते. ठिकठिकाणी मोठमोठ्या घोषणा दिल्या जात होत्या.