हातात तलवारी घेऊन शहरात दहशत निर्माण केली
केज (रिपोर्टर): केज शहरामध्ये रात्री एका टपरी चालकासोबत वाद निर्माण झाल्याने या वादाचे पर्यावसन भांडणामध्ये झाले. टपरी चालकास सात ते आठ जणांनी तलवारीने मारहाण करून गंभीररित्या जखमी केल्याची घटना रात्री साडेआठच्या सुमारास घडली. जखमी तरुणास अंबाजोगाई येथील रुग्णालयात दाखल करण्यात आले. मारहाण करणारे हातात तलवारी आणि दांडे घेऊन आले होते, त्यामुळे शहरात रात्री दहशतीचे वातावरण निर्माण झाले होते.
केज बसस्थानकासमोर असलेल्या सय्यद ईरशाद अली या टपरी चालकाचे व रणसिंग गोके याच्यात गुटखा देण्या-घेण्याच्या कारणावरून वाद निर्माण झाला. या वादाचे पर्यावसन तुंबळ हाणामारीत झाले. गोके याने आपल्या अन्य साथीदारांना आणून सय्यद ईरशाद अली याच्यावर तलवारीने वार करून गंभीररित्या जखमी करण्यात आले. सदरील जखमी तरुणास अंबाजोगाई रुग्णालयात दाखल करण्यात आले आहे. मारहाण करणारे हातात तलवारी, दांडे घेऊन मोटारसायकलवर आल्याने बसस्थानक परिसरात दहशतीचे वातावरण निर्माण झाले होते. याचा व्हिडिओही सोशल मिडियावर व्हायरल झाला होता. या प्रकरणी दुपारपर्यंत केज पोलिसात गुन्हा दाखल झाला नव्हता. रणसिंग गोके याला केज पोलिसांनी ताब्यात घेतले.
