धक्कादायक : भगीरथ बियाणींनी स्वत:च्या डोक्यात गोळी झाडली
गोळी डोक्यातच, दुर्दैवी मृत्यू; घटनास्थळी जिल्हा पोलीस अधिक्षक
सिटीस्कॅननंतर शवविच्छेदन, आत्महत्येचे कारण अद्याप समोर नाही;
शांत, संयमी, कर्तव्यदक्ष कार्यकर्ता गेल्याचे बीडकरांना दु:ख
बीड (रिपोर्टर) भारतीय जनता पार्टीचे बीड शहर अध्यक्ष भगीरथ बियाणी यांनी आज सकाळी स्वत:च्या डोक्यात गोळी घालून आत्महत्या केल्याची खळबळजनक घटना घडली. भागीरथ बियाणी यांनी आत्महत्या का केली? याबाबत अद्याप अधिकृत माहिती प्राप्त झाली नसली तरी घटनास्थळी पंचनामा करण्यासाठी जिल्हा पोलीस अधिक्षक नंदकुमार ठाकूर हे पोहचले आहेत. तर दुसरीकडे भागीरथ बियाणी यांचा मृतदेह शवविच्छेदनासाठी जिल्हा रुग्णालयात आणण्यात आला आहे. डोक्यात झाडून घेण्यात आलेली गोळी बाहेर आली नसल्याने सिटीस्कॅन करण्यात येणार असल्याची माहिती समोर येत आहे. सदरची धक्कादायक घटना घडल्यानंतर जिल्हा रुग्णालयात भाजप कार्यकर्त्यांनी मोठी गर्दी केली होती. बियाणी यांचे सर्वांसोबत चांगले संबंध तर होतेच, स्वभाव मनमिळावू आणि शांत होता. अशा स्थिती भागीरथ बियाणी यांनी आत्महत्या केल्याने सर्वत्र हळहळ व्यक्त करण्यात येत आहे.
या बाबत अधिक माहिती असे की, बियाणी कुटुंब हे मूळचे पिंपळनेर येथील असून गेल्या चाळीस वर्षांपासून ते बीड शहरात वास्तव्यास आहेत. दोन भाऊ वेगवेगळ्या क्षेत्रांमध्ये उद्योग धंदे करत असून भागीरथ बियाणी हे उद्योग धंद्याबरोबर सक्रिय राजकारणामध्ये सुरुवातीपासून काम करत आहेत. राजकारणासह समाजकारणाला महत्व देत समाजाबरोबर इतर समाजातील लोकांचे काम करण्यास भगीरथ बियाणी हे सातत्याने पुढे असायचे. आज सकाळी अकरा वाजण्याच्या सुमारास भगीरथ बियाणी यांनी आपल्या बामणवाडी येथील राहत्या घरी स्वत:च्या पिस्तुलमधून डोक्यात गोळी झाडून घेतली. तशा परिस्थितीत घरच्यांनी तात्काळ त्यांना बीड येथील फिनिक्स रुग्णालयामध्ये उपचारासाठी दाखल केले मात्र तत्पुर्वीच भगीरथ बियाणी यांचा दुर्दैवी मृत्यू झाला होता. भगीरथ बियाणी यांच्या मृत्यूची माहिती वार्यासारखी शहरात पसरली. शांत स्वभावाच्या सक्रिय कार्यकर्त्याने आत्महत्या केली ही माहितीच ऐकणार्यांसाठी धक्कादायक होती. शवविच्छेदनासाठी त्यांचा मृतदेह बीडच्या शासकीय रुग्णालयामध्ये आणण्यात आला. रुग्णालयामध्ये मोठया संख्येने भाजपा कार्यकर्त्यांसह बिणयाणी कुटुंबाशी संबंध असलेले अनेक लोक जमा झाले आहेत. भगीरथ यांनी आत्महत्या करण्यासारखं मोठं पाऊल का उचललं? हे अद्याप समजू शकले नाही. त्यांनी झाडून घेतलेली गोळी ही डोक्यातच असल्याने त्यांचे सिटीस्कॅन करण्यात येणार आहे. घटनेचे गांभीर्य पाहून स्वत: जिल्हा पोलीस अधिक्षक नंदकुमार ठाकूर यांनी अशधी फिनिक्समध्ये भेट दिली तर नंतर ते जातीने घटनास्थळावर पंचनामा करण्यासाठी गेले. या घटनेने बीड शहर सुन्न झाले असून राजकारणातला आणि समाजकारणातला सक्रिय कार्यकर्ता आपल्यातून गेल्याची भावना आज प्रत्येकाला आहे. आत्महत्येचे कारण समोर यावे, अशी भावना प्रत्येकाची आहे. शवविच्छेदनानंतर बियाणी यांचा पार्थीव देह कुटुंबियांना सोपविण्यात येणार असल्याची माहिती पोलिसांनी दिली.
नक्की काय झालं?
भगीरथ बियाणी हे रात्री मुंबईसाठी रवाना झाले होते. मात्र ते अर्ध्या रस्त्यातून परत आले. सकाळी सहा ते सातच्या दरम्यान ते परत आल्याचे सांगण्यात येते. आल्यानंतर ते आपल्या तिसर्या मजल्यावरील बेडरुममध्ये झोपलेही. सकाळी दहाच्या सुमारास त्यांनी बेडरुममधील बाथरुममध्ये जाऊन स्वत:वर गोळी झाडून घेतली. त्यानंतर याची माहिती घरच्यांना झाल्यानंतर त्यांना रुग्णालयात दाखल
करण्यात आले.
खा. प्रितम मुंडेंनी बैठक
सोडून दवाखाना गाठला
खा. प्रितम मुंडे या आज बीड शहरात डेरेदाखल होत्या. त्यांची जिल्हाधिकारी राधाबिनोद शर्मा यांच्यासोबत बैठक सुरू होती. त्या दरम्यान त्यांना या दुर्दैवी आणि धक्कादायक घटनेची माहिती कळली. त्यांनी तात्काळ आधी फिनिक्स हॉस्पिटल गाठलं आणि नंतर जिल्हा रुग्णालयात आल्या.
