सिगारेट पाकिटच्या किंमतीवरून घटना
अज्ञात तिघांविरोधात गुन्हा दाखल
परळी (रिपोर्टर): शंभर रुपयाच्या सिगारेट पाकिटची किंमत दीडशे रुपये का सांगतो? परळीत ते शंभर रुपयांना भेटते, तू जास्त पैसे का घेतो, असे म्हणत अज्ञात तिघांपैकी एकाने स्वत:जवळील पिस्तुलातून हवेत फायर केल्याची घटना परळी जवळील कन्हेरवाडी शिवारात रात्री दहा वाजण्याच्या सुमारास घडली. कन्हेरवाडी येथील यशराज हॉटेल या ठिकाणी हा प्रकार घडल्यानंतर घटनास्थळी पोलिसांनी धाव घेतली. हा सर्व प्रकार सीसीटीव्ही कॅमेर्‍यामध्ये कैद झाला आहे.
परळी पासून काही अंतरावर असलेल्या कन्हेरवाडी शिवारात यशराज हॉटेल आहे. या ठिकाणी विलास किसनराव आघाव यांचे यशराज हॉटेल आहे. रात्री दहाच्या सुमारास त्यांच्या हॉटेलमध्ये अज्ञात तिघे डेरेदाखल झाले. त्यांनी सिगारेट पॉकेट मागीतले. त्या सिगारेट पॉकेटची किंमत हॉटेल चालकाने दीडशे रुपये सांगितली, त्यावेळी शंभर रुपयांच्या सिगारेट पाकिटची किंमत दीडशे रुपये का सांगतो, परळीत ते शंभर रुपयाला भेटते, असे म्हणत त्यातील एकाने आपल्या जवळील पिस्तूल बाहेर काढत हवेत गोळीबार केला. या गोलीबाराच्या घटनेने काही काळ यशराज हॉटेल परिसरात घबराटीचे वातावरण निर्माण झाले. गोळीबार करणारे कोण? हे अद्याप समजू शकले नसले तरी आघाव यांनी दिलेल्या फिर्यादीनुसार हे तिगे एका स्कॉर्पिओमध्ये आले होते. त्यांच्या फिर्यादीवरून तिघांविरोधात गुन्हा दाखल झाला आहे. हा सर्व प्रकार तेथील सीसीटीव्ही कॅमेर्‍यात कैद झाला आहे.
