गेवराईत गहिनीनाथ गर्जे यांच्यासह दोघावर गुन्हा दाखल
गेवराई (रिपोर्टर) : विठ्ठलनगर गेवराई येथील 64 वर्षीय आदिनाथ महादेव गर्जे यांनी त्यांचा भाऊ गहिनीनाथ गर्जे आणि त्यांच्या मुलांविरुद्ध बनावट बक्षीसपत्राद्वारे घर हडपण्याचा कट रचल्याचा गंभीर आरोप करत गेवराई पोलिस ठाण्यात फिर्याद देत गुन्हा दाखल केला आहे. पुढील तपास पोलिसांनी सुरू केला आहे.
आदिनाथ गर्जे यांनी फिर्यादीत म्हटले आहे की, त्यांच्या 3600 चौरस फुटांच्या सहन प्लॉटवर (पिटीआर अनु. क्र. 06, मालमत्ता क्र. 05) त्यांचा भाऊ गहिनीनाथ आणि त्यांची मुले प्रीतेश व प्रीतम यांनी संगनमताने बनावट बक्षीसपत्र तयार केले. हा प्लॉट आदिनाथ यांच्या वयोवृद्ध आणि आजारी आई जिजाबाई गर्जे यांच्या नावे आहे. आरोपींनी ग्रामपंचायत पीटीआर रेकॉर्डची प्रत काढून त्यावर हाताने चतुःसीमा लिहून मूळ दस्तऐवजात फेरफार केले. यानंतर, गेवराई रजिस्टर ऑफिसमध्ये 24 एप्रिल 2025 रोजी दस्त क्र. 2231/2025 अंतर्गत बनावट बक्षीसपत्र नोंदवून प्लॉट प्रीतेश आणि प्रीतम यांच्या नावे केला.
आदिनाथ यांचा मुलगा गणेश याने दस्तऐवज तपासताना हा प्रकार उघडकीस आणला. त्यांना आढळले की, बनावट बक्षीसपत्रात आदिनाथ यांच्या ताब्यातील राहत्या घराची चतुःसीमा लिहिली आहे. यामुळे आरोपींचा उद्देश आदिनाथ यांचे घर बळकावण्याचा असल्याचे स्पष्ट झाले. ग्रामविकास अधिकार्यांनीही पीटीआर रेकॉर्डवर चतुःसीमा नसल्याचे सांगितले.या प्रकरणी आदिनाथ महादेव गर्जे यांच्या फिर्यादीनुसार गेवराई पोलिस ठाण्यात गुन्हा दाखल करण्यात आला असून पुढील तपास हे पोलिस हवालदार रविंद्र दशरथ राऊत करत आहे. आदिनाथ यांनी शासनाची आणि स्वतःची फसवणूक झाल्याचा आरोप केला असून, आरोपींविरुद्ध कठोर कारवाईची मागणी केली आहे. हा प्रकार परिसरात खळबळ माजवणारा ठरला आहे.
