बीडच्या शेतकर्‍यांनी औरंगाबादमध्ये सहसंचालक कार्यालयासमोर बोंबा ठोकल्या

औरंगाबाद (रिपोर्टर); बीड जिल्ह्यातील बहुतांश कारखाने इतर जिल्ह्यातील ऊस गाळप करीत असून गेटकेन पद्धतीचा ऊस आणणे बंद करण्यात यावे, मराठवाड्यातील ऊसाला पश्‍चिम महाराष्ट्राच्या धरतीवर भाव देण्यात यावा यासह इतर मागण्यासाठी शेतकरी संघर्ष समितीच्या वतीने औरंगाबादच्या प्रादेशिक सहाय्यक संचालक कार्यालयाच्या समोर बोंब मारो आंदोलन करण्यात आले. शेतकरी कार्यालयाला कुलूप ठोकण्यास गेले होते मात्र पोलीसांनी त्यांना रोखले. हे आंदोलन गंगाभिषण थावरे यांच्या नेतृत्वाखाली झाले. माजलगाव तालुक्यातील कारखानदार इतर जिल्ह्यातून ऊस आणून गाळप करत असल्याने स्थानिक ऊस उत्पादक शेतकर्‍यांचे नुकसान होवू लागले आहे. बाहेरचा ऊस आणणे बंद करावा, 265 ऊसाची नोंदणी करण्यात यावी, ऊसाला पश्‍चिम महाराष्ट्राच्या धरतीवर भाव देण्यात यावा यासह इतर मागण्यासाठी प्रादेशिक सहायक संचालक (साखर कार्यालयाच्या समोर) शेतकरी संघर्ष समितीच्या वतीने बोंबा मारो आंदोलन केले. शेतकर्‍यांनी कुलूप ठोकण्याचा इशारा दिला होता मात्र पोलीसांनी शेतकर्‍यांना मोठ्या प्रमाणात गराडा घालून त्यांना रोखण्यात आले. हे आंदोलन भाई गंगाभिषण थावरे यांच्या नेतृत्वाखाली करण्यात आले. या आंदोलनात बीडचे बहुतांश शेतकरी सहभागी झाले होते.