गेवराई (रिपोर्टर) पाचेगाव येथून महिला बचत गटाचे कलेक्शन करून गेवराईच्या दिशेने जाणार्या आयडीएफसीबी बँकेच्या कर्मचार्याची पैशाची बॅग पाठीमागून आलेल्या दुचाकीस्वाराने हिसकावून बीडच्या दिशेने पोबारा केल्याची घटना आज सकाळी साडेअकरा वाजता पाडळसिंगीजवळ घडली. या प्रकरणी गेवराई पोलिसांना माहिती मिळताच सहायक पोलीस निरीक्षक प्रफुल्ल साबळे यांनी घटनास्थळी भेट देऊन पथक चोरट्याच्या मागावर रवाना केले आहे.
बीड येथील आयडीएफसीबी बँकेत नोकरीला असलेल्या सुदर्शन शिवाजी वाघ (रा. माटेगाव ता. बीड) हे गेवराई येथील वसुलीचे काम पाहतात. ते आज सकाळी पाचेगाव येथील महिला बचत गटाची वसुली करून पाडळसिंगी मार्गे गेवराईकडे जात होते. या वेळी गेवराईकडून आलेल्या दोन दुचाकीस्वारांनी त्यांच्या पाठीवरील पैशाची बॅग हिसकावून बीडच्या दिशेने पोबारा केला. बॅगमध्ये त्यांनी कलेक्शन केलेले 95 हजार 610 रुपये होते. त्यांनी आरडाओरड केली मात्र तोपर्यंत चोरटे पसार झाले होते. त्यांनी तात्काळ गेवराई पोलिसांना फोन लावून माहिती दिली. त्यावेळी गेवराईचे सहायक पोलीस निरीक्षक प्रफुल्ल साबळे यांनी तात्काळ घटनास्थळी भेट दिली. आरोपीच्या मागावर पथक पाठवले असून लवकरात लवकर आरोपींच्या मुसक्या बांधू असे त्यांनी सांगितले.