बीड (रिपोर्टर) लातूरहून जालनाकडे निघालेल्या ब्रेझा गाडीला ट्रकने जोराची धडक दिल्याने या अपघातात पाच जण जखमी झाले असून एकाची प्रकृती गंभीर आहे. ही घटना आज सकाळी साडे आठ वाजण्याच्या दरम्यान पाडळसिंगीजवळ घडली. जखमींना उपचारार्थ जिल्हा रुग्णालयात दाखल करण्यात आले.
लातूर येथील दयानंद कॉलनी भागात राहणारे पाटील कुटुंबिय ब्रेझा गाडीने जालनाकडे जात होते. बीड शहराजवळ असलेल्या पाडळसिंगीजवळ त्यांच्या गाडीला ट्रकने जोराची धडक दिली. या अपघातात जयश्री पाटील (वय 55), साक्षी पाटील (वय 22 वर्षे), अपर्णा लकशेट्टी (वय 23), आदिती लकशेट्टी (वय 10 वर्षे) आणि चालक बनसोडे असे पाच जण जखमी झाले. जखमींना वाहतूक शाखेचे कर्मचारी शेळके यांनी तात्काळ जिल्हा रुग्णालयात दाखल केले. जखमींना जिल्हा रुग्णालयात दाखल केल्यानंतर जिल्हा शल्यचिकित्सक डॉ. सुरेश साबळे, डीएमओ कौशल्या शिंदे यांच्यासह आदी कर्मचार्यांनी त्यांच्यावर तातडीने उपचार केले.