बीड (रिपोर्टर) घराच्या बांधकामाला बोअरचे पाणी का देत नाही? या किरकोळ कारणावरून एका तरुणास रॉडने गंभीर मारहाण केल्याची घटना काल दुपारी शहरातील धांडे नगर भागात घडली. यामध्ये सदरील तरुण गंभीररित्या जखमी झाला. त्याच्या डोक्याला, हाताला आणि पायाला मार लागला. शहरामध्ये गेल्या काही दिवसांपासून गुन्हेगारी वाढत असल्याचे दिसून येत आहे. गुन्हेगारी वृत्तीच्या लोकांवर कठोर कारवाई करण्याची मागणी केली जात आहे. सतीश हनुमंत सदरे (रा. साईनगर, दुबे कॉलनी, बीड) या तरुणास खंडेश्वरी भागातील झोपडपट्टी परिसरात राहणार्या किरण शिंदे नामक तरुणाने काल दुपारी शहरातील धांडेनगर भागात रॉडने मारहाण केली. मारहाण करून त्याच्या जवळील नगदी 48 हजार रुपये व मोबाईल हिसकावून घेतला आहे. मारहाणीत सदरे याच्या डोक्याला, हाताला आणि पायाला गंभीर मार लागला. किरण शिंदे याचे बांधकाम सुरू असल्याने त्याच्या बांधकामाला सतीश सदरे याने बोअरचे पाणी दिले नसल्याचे कारण पुढे करत सदरे यास मारहाण करण्यात आली. त्यास उपचारार्थ बीडच्या जिल्हा रुग्णालयामध्ये दाखल करण्यात आले. शहरामध्ये गेल्या काही दिवसांपासून गुन्हेगारी वाढली असून गुन्हेगारी वृत्तीच्या लोकांविरोधात जिल्हा पोलीस अधिक्षकांनी कठोर कारवाई करण्याची मागणी केली जात आहे.